DR Congo: Ibyaranze iserukiramuco 'Amani Festival': M'bilia Bel, intore zo mu Rwanda, ba 'mucoma'...

Bamwe mu bitabiriye iserukiramuco ry'amahoro 'Amani Festival' Uwufise ububasha kw’isanamu LEY UWERA

Mu kibuga, rwagati mu mujyi wa Goma, mu burasirazuba bwa Repubulika ya Demokarasi ya Kongo, mu mpera y'icyumweru gishize abantu 36,000 bagize amahirwe yo kwibagirwa by'akanya gato ubwoba bw'umutekano mucye, bidagadura mu iserukiramuco ryitiriwe amahoro - 'Amani Festival'.

Iri serukiramuco ngaruka mwaka, ryitiriwe ijambo ry'Igiswayile 'Amani' risobanuye 'Amahoro', ni igihe cy'imbonekarimwe aho imbaga y'abantu bangana gutyo bateranira hamwe.

Goma ni wo mujyi mukuru mu karere uherereyemo k'uburasirazuba bwa DR Congo kiyongereyemo ibikorwa by'umutekano mucye mu mezi macye ashize.

Ibitero by'umutwe w'inyeshyamba ADF (Allied Democratic Forces) n'ibikorwa by'ingabo za leta ya DR Congo byo kugerageza kuwumenesha ukava muri icyo gihugu byavuyemo impfu z'abaturage b'abasivile babarirwa muri za magana.

Uwufise ububasha kw’isanamu LEY UWERA

Ni iserukiramuco ryamaze iminsi itatu, ritangirana n'igikorwa cyo gusengera abapfuye - icyo gikorwa cyagendeye ku gihangano cya Mozart, intyoza mu muziki wa 'classique', ariko gisobanurwa mu buryo bw'umuco wa Congo binyuze mu bihangano bitandukanye.

Abantu bakiriho na bo baributswe.

Guillaume Bisimwa wateguye iryo serukiramuco yagize ati:

"Turimo kwishyira hamwe... mu kwereka amahanga ko ubuzima bukiriho, ko tuzi ko ejo hazaza heza kurushaho ari twe twese hareba kandi ko tugomba gukorera hamwe ngo tuhubake".

Uwufise ububasha kw’isanamu LEY UWERA
Uwufise ububasha kw’isanamu LEY UWERA

M'bilia Bel, umwamikazi w'injyana ya rumba kuri ubu ugeze mu kigero cy'imyaka ya za 60, yasusurukije abafana be kubera ijwi rye rihogoza. Mu ndirimbo yabyinnye harimo izakunzwe ze zo mu myaka ya 1980 nka 'Mpeve ya Longo' na 'Yamba Nga'.

Bamwe mu bitabiriye iryo serukiramuco barifashe nk'akanya keza bari babonye ko kurimba kakahava.

Uwufise ububasha kw’isanamu LEY UWERA

Umwe muri abo ni Kasiski Vaillant w'imyaka 19 y'amavuko, akaba ukora akazi ko gushushanya hifashishijwe ikoranabuhanga (visual artist). Yari yambaye ingofero, indorerwamo n'ibikomo yikoreye we ubwe.

Abandi bifotozanyije indorerwamo zabo zo kubarinda izuba ndetse bisize n'amarangi mu maso.

Uwufise ububasha kw’isanamu LEY UWERA

Umuhanzi Innoss'B uzwi cyane muri ako gace wanagarutsweho nk'umwe mu basusurukije cyane abitabiriye 'Amani Festival', yageze ku rubyiniro ubwo izuba ryari ryarenze ku wa gatandatu nijoro.

Uwufise ububasha kw’isanamu LEY UWERA

Abitabiriye iserukiramuco baryohewe n'uko yabyinnye indirimbo ye 'Yope' yamamaye muri aka karere nyuma yo kuyikorana n'ikirangirire mu muziki muri Tanzania, Diamond Platnumz.

Uwufise ububasha kw’isanamu LEY UWERA

Umuhanzi wo muri Sénégal w'indirimbo za 'gospel' Faada Freddy, wigeze kuba mu itsinda ry'abantu babiri ryo mu njyana ya rap rya Daara J, ni umwe mu bahanzi bakomeye bo mu mahanga bitabiriye iryo serukiramuco.

Didier Awadi, undi muhanzi wo muri Sénégal wo mu njyana ya hip hop, yibutse abishwe mu bwicanyi bwo mu majyaruguru ya Goma, avuga ko badakwiye kwibagirana.

Kubera ko iri serukiramuco ryari iryo guteza imbere amahoro mu karere, ryanitabiriwe n'abahanzi gakondo bo mu Rwanda ruhana imbibi na DR Congo.

Uwufise ububasha kw’isanamu LEY UWERA

Itorero ry'intore ryaturutse mu Rwanda ryarahamirije.

Abantu banabonye akanya ko gushuna kuri ka 'borchette', aha muri DR Congo kazwi nka 'nyama choma'.

Uwufise ububasha kw’isanamu LEY UWERA

Ba 'muchoma' cyangwa abotsa inyama Dieume na Pedjos ni bo bari ku cyokezo ngo abitabiriye iserukiramuco batagira ikibazo cyo kubura ku kaboga.

Abitabiriye iryo serukiramuco bari bisanzuye cyane kandi bishimye, bisa nkaho ari uburyo bwiza bwo guhuza imiryango.

Abateguye iserukiramuco 'Amani Festival' bashakaga kwerekana indi sura y'uburasirazuba bwa DR Congo itari gusa iy'ahantu harangwa n'amakimbirane n'umutekano mucye.

Iryo serukiramuco ryabaye nk'iryibagiza ibyo abaryitabiriye, by'igihe gito, ariko amakuru mabi y'umutekano mucye yo ntaho arajya.

Uwufise ububasha kw’isanamu LEY UWERA