Coronavirus: Minisitiri wungirije w'ubuzima wa Iran bayimusanzemo

Iraj Harirchi (ibumoso), Minisitiri wungirije w'ubuzima wa Iran, yakoroye ndetse agaragara abira icyuya ubwo yari mu kiganiro n'abanyamakuru ku wa mbere Uwufise ububasha kw’isanamu Reuters
Image caption Iraj Harirchi (ibumoso), Minisitiri wungirije w'ubuzima wa Iran, yakoroye ndetse agaragara abira icyuya ubwo yari mu kiganiro n'abanyamakuru ku wa mbere

Minisitiri wungirije w'ubuzima wa Iran ndetse n'umudepite bombi basanzwemo ubu bwoko bushya bwa coronavirus, mu gihe iki gihugu imaze kwicamo abantu 15 gikomeje kugorwa no kuyihagarika.

Iki gihugu ni kimwe mu hantu hatatu hugarijwe cyane na coronavirus hanze y'Ubushinwa, ibintu biri gutera impungenge ko iyi virusi ishobora kuba iri guhinduka icyorezo.

Uwo Minisitiri wungirije w'ubuzima, Iraj Harirchi, ku wa mbere yahakanye ko hari ibikorwa byo guhishira amakuru ajyanye na coronavirus mu gihugu.

Yagaragaye nk'utameze neza ku mubiri ubwo yaganiraga n'abanyamakuru, akorora ndetse agaragara abira icyuya.

Iran imaze gutangaza abantu 95 banduye coronavirus, ariko umubare w'ukuri w'abamaze kuyandura byibazwa ko ushobora kuba ari munini kurushaho.

Umukuru w'ishami ry'umuryango w'abibumbye ryita ku buzima (OMS/WHO) yavuze ko uko kwiyongera kw'ako kanya kw'abanduye coronavirus hanze y'Ubushinwa "guteye impungenge zikomeye".

Ejo ku wa kabiri, Mike Pompeo, umunyamabanga wa leta y'Amerika, yavuze ko Amerika itewe impungenge nuko Iran ishobora kuba yarahishiriye "amakuru y'ingenzi" ajyanye na coronavirus ndetse ashishikariza ibihugu byose "kuvugisha ukuri kuri coronavirus".

Uwufise ububasha kw’isanamu EPA
Image caption Impuguke mu buzima zivuga ko igihe gishobora kuba cyararenze cyo kurinda ko coronavirus ihinduka icyorezo ku isi

Abantu benshi kurushaho bamaze kwicwa na coronavirus muri Iran kurusha ahandi hantu aho ari ho hose ho hanze y'Ubushinwa. Ibi bihugu byombi bifitanye umubano ukomeye ushingiye ku bucuruzi.

Ibindi bihugu ubu biri kuvugwaho cyane kubera coronavirus ni Koreya y'Epfo n'Ubutaliyani, aho umubare w'abayanduye wiyongereye cyane mu minsi micye ishize.

Ku isi abantu barenga 80,000 bamaze kwandura indwara yo mu myanya y'ubuhumekero izwi nka Covid-19 iterwa n'ubu bwoko bushya bwa coronavirus kuva yakwaduka mu mwaka ushize.

Abantu bagera hafi ku 2,700 imaze kubahitana - benshi muri bo bakaba ari abo mu Bushinwa.

Uwufise ububasha kw’isanamu AFP
Image caption Amatsinda y'abakora mu bikorwa by'ubuzima barimo guhumanura ahantu hahurirwa n'abantu benshi mu mujyi wa Qom, ndetse no ku rusengero rwa Hazrat Masumeh

Ariko uko ibintu bimeze ubu muri Iran byateje impungenge zikomeye zuko coronavirus ishobora kuba igiye kwibasira akarere k'uburasirazuba bwo hagati.

Muri icyo gihugu hari ahantu hafatwa nk'ahatagatifu hahurira abantu babarirwa muri za miliyoni buri mwaka kandi hakaba ari mu karere aho ibihugu byinshi bifite inzego z'ubuzima zifite intege nke.

Mu hantu hugarijwe cyane muri iki gihe ho hanze y'Ubushinwa, Iran ni yo ihangayicyishije cyane kuko nta shusho yuzuye y'ukuri y'uko ibintu bimeze muri icyo gihugu ihari, nkuko bivugwa na Dr Nathalie MacDermott, impuguke mu ndwara zandura wo kuri Kaminuza ya King's College London mu Bwongereza.

Ibindi bisa n’ibi