Michael Bloomberg yakuyemo ake karenge mu gushaka kuba perezida w'Amerika

Bwana Bloomberg yakoresheje arenga miliyoni 500 z'amadolari ashaka kuba umukandida w'ishyaka ry'abademokarate

Ahavuye isanamu, Getty Images

Insiguro y'isanamu,

Bwana Bloomberg yakoresheje arenga miliyoni 500 z'amadolari ashaka kuba umukandida w'ishyaka ry'abademokarate

Michael Bloomberg yikuye mu bikorwa byo gushaka kwiyamamariza kuba perezida w'Amerika, nyuma yo kwitwara nabi mu matora y'ibanze yo ku munsi w'ejo ku wa kabiri azwi nka "Super Tuesday".

Yagize ati: "Mu mezi atatu ashize, ninjiye mu bikorwa byo guhatanira kuba perezida ngo mpigike Donald Trump. Uyu munsi, mvuye muri iryo hatana ku bw'iyo mpamvu nubundi".

Bwana Bloomberg, wahoze ari umukuru w'umujyi wa New York, yakoresheje arenga miliyoni 500 z'amadolari ye bwite ashaka kuba umukandida wahagararira ishyaka ry'abademokarate.

Yavuze ko ubu agiye gushyigikira Joe Biden wigeze kuba Visi-Perezida w'Amerika.

Mu itangazo yasohoye, Bwana Bloomberg yagize ati:

"Iteka ryose namye nemera ko gutsinda Donald Trump bitangirira ku kwifatanya n'umukandida ufite amahirwe menshi ashoboka yo kumutsinda. Nyuma y'amatora y'ejo, biragaragara ko uwo mukandida ari inshuti yanjye akaba n'Umunyamerika ukomeye, Joe Biden".

Muri za leta 14 zatoye ejo ku wa kabiri, Bwana Bloomberg, umuherwe utunze za miliyari z'amadolari, yashoboye gusa gutsinda mu gace ka American Samoa.

Joe Biden yatsinze muri leta icyenda muri izo, ikintu gikomeye yagezeho mu bikorwa bye byo kwiyamamaza.

Bwana Biden yakoze ibitari byitezwe ubwo yatsindaga hamana muri leta y'ingenzi ya Texas, akayambura uwo bahatanye bya hafi, Bernie Sanders.

Ariko Bwana Sanders byitezwe ko atsinda muri leta ya California - ihatanirwa cyane iri joro - ndetse no mu zindi leta eshatu.

Bombi ni bo bari imbere mu bademokarate bashaka guhatana n'umurepubulikani Donald Trump mu matora ya perezida yo mu kwezi kwa cumi na kumwe uyu mwaka.