Coronavirus: Ibiro bya perezida byemeye ko Amerika idafite ibikoresho bihagije byo kuyipima

Abantu bambaye ibyo kubakingira mu maso nyuma yo kugera ku kibuga cy'indege cy'i Los Angeles muri Amerika ku munsi w'ejo

Ahavuye isanamu, Getty Images

Insiguro y'isanamu,

Abantu bambaye ibyo kubakingira mu maso nyuma yo kugera ku kibuga cy'indege cy'i Los Angeles muri Amerika ku munsi w'ejo

Ibiro bya perezida wa Leta Zunze Ubumwe z'Amerika, White House, byemeye ko iki gihugu kidafite ibikoresho bihagije byo gupima coronavirus, mu gihe umubare w'abayanduye wiyongereye muri iki gihugu.

Visi Perezida Mike Pence yavuze ko ubutegetsi bw'Amerika butazashobora kugera ku ntego yabwo yo gutanga ibikoresho miliyoni imwe muri iki cyumweru byo gupima coronavirus.

Hagati aho, inteko ishingamategeko y'Amerika yatoye mu buryo bwihuse bidasanzwe yemera inkunga itubutse y'ingoboka yo kurwanya coronavirus.

Ku isi hose, abategetsi bemeje ko abantu barenga 92,000 bamaze kwandura iyo virusi.

Umubare munini w'abo bayanduye ku isi - ni ukuvuga abantu 80,552 - ni abo mu Bushinwa, aho iyo virusi yatangiriye. Kugeza ubu, abantu 3,042 imaze kubica muri icyo gihugu.

Ahavuye isanamu, CDC

Insiguro y'isanamu,

Ibikoresho byo gupima coronavirus by'ikigo cy'Amerika cyo kurwanya no kwirinda indwara (CDC, mu magambo ahinnye y'Icyongereza)

Ku munsi w'ejo ku wa kane, umubare w'abamaze kwicwa na coronavirus muri Amerika warazamutse ugera ku bantu 12, bose ukuyemo umwe bakaba ari abo muri leta ya Washington.

Ubu muri Amerika hari abantu barenga 200 banduye Covid-19 - indwara y'ubuhumekero iterwa n'iyo virusi - muri leta 20 mu zigize icyo gihugu.