Minisitiri w'intebe wa Sudan Abdalla Hamdok yarusimbutse

Abdalla Hamdok ni Minisitiri w'intebe wa Sudan kuva mu kwa munani k'umwaka ushize

Ahavuye isanamu, EPA

Insiguro y'isanamu,

Abdalla Hamdok ni Minisitiri w'intebe wa Sudan kuva mu kwa munani k'umwaka ushize

Minisitiri w'intebe wa Sudan amaze kurokoka igitero cyari kigambiriye kumwivugana nyuma yaho urukurikirane rw'imodoka yari arimo zigabweho igitero mu murwa mukuru Khartoum.

Mu butumwa bwo kuri Twitter, Minisitiri w'intebe Abdalla Hamdok yanditse ati: "Ndifuza guhumuriza abaturage ba Sudan ko ndi muzima kandi meze neza ku mubiri".

Yavuze ko niba hari ikintu icyo gitero cyakoze, nta kindi kitari "gutera umuhate w'inyongera wo kwerekeza ku mpinduka muri Sudan".

Ntibiramenyekana uwagabye icyo gitero, ariko uko ibintu bimeze ubu muri politiki ya Sudan ntibirajya mu buryo kubera ko inzibacyuho yatangiye mu mwaka ushize yatumye bamwe mu bari ibikomerezwa, cyane cyane bo mu gisirikare, bashyirwa ku ruhande.

Byagenze gute muri icyo gitero?

Amashusho yanyuze kuri televiziyo y'igihugu ya Sudan agaragaza imodoka nyinshi zangiritse bikomeye aho icyo gisasu cyaturikiye, nkuko bitangazwa n'ibiro ntaramakuru AFP.

AFP isubiramo amagambo yo mu butumwa bwo kuri Facebook bwa Ali Bakhit, umukuru w'ibiro bya minisitiri w'intebe, agira ati: "Igisasu cyaturitse ubwo imodoka ya Minisitiri w'intebe Abdalla Hamdok yari itambutse ariko Imana ishimwe ko ntawagize icyo aba".

Ibiro ntaramakuru Reuters bitangaza ko ababibonye bavuga ko icyo gitero cyabereye hafi y'inzira yo mu majyaruguru ashyira uburasirazuba ku gice cyinjira ku iteme rya Kober, rihuza amajyaruguru ya Khartoum na rwagati mu mujyi ahari ibiro bya minisitiri w'intebe.

Ahavuye isanamu, AFP

Insiguro y'isanamu,

Aho byabereye hazitiwe na polisi

Ababibonye bavuga ko bigaragara nkaho iyo modoka ya Bwana Hamdok yari yapimiwe mu kirere cyo hejuru y'aho yacaga.

Bwana Hamdok ni muntu ki?

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Bwana Hamdok yahoze akorera umuryango w'abibumbye nk'impuguke mu bukungu ndetse avuga ko kimwe mu byo ashyize imbere ari ugukemura ikibazo cy'ubukungu Sudan ifite muri iki gihe.

Yagizwe umukuru wa leta y'inzibacyuho muri Sudan mu kwezi kwa munani mu mwaka ushize.

Hari hashize amezi ane Omar al-Bashir wari Perezida wa Sudan mu gihe cy'imyaka hafi 30 ahiritswe ku butegetsi mu kwezi kwa kane mu 2019.

Yashyizweho n'inama nkuru ya Sudan, igizwe n'abaturage b'abasivile batandatu n'abasirikare batanu, ngo ayobore inzibacyuho izamara imyaka itatu yerekeza ku butegetsi bw'abasivile, nyuma yaho Bwana Bashir ahirikiwe.

Nkuko bitangazwa na Reuters, kuva yagera kuri uwo mwanya, leta ayoboye yakomeje kunanizwa mu gihe igerageza gushyira mu bikorwa amavugurura mu bukungu.

Minisitiri w'intebe Hamdok yavuze ko icyo gitero ku rukurikirane rw'imodoka yari arimo kitazahagarika inzira yatangiye y'inzibacyuho.

Kuri Twitter yanditse ati: "Twigomwe byinshi cyane ngo tugere kuri iyi mpinduramatwara igamije kugera kuri ejo hazaza heza kurushaho no ku mahoro arambye. Impinduramatwara yacu ikwiye iteka kurindwa n'ubunyamahoro bwayo".