Leta y'u Burundi ihanura abashaka kuza mu gihugu gutenyenya kubera coronavirus

Umushikiranganji ajejwe imigenderanire y'u Burundi n'amakurungu, Ezechiel Nibigira, yabwiye BBC ko bahagaritse gutanga impusha zo kwinjira, visa, mu ntumbero yo gukumira ikiza ca coronavirus.

Umushikiranganji Nibigira yavuze kandi ko bariko barakorana n'amakungu mu rugamba rwo kurwanya iki kiza.

Yavuze ko n'Umurundi yoba ashaka gutahuka yoba aratenyenya ngo kuko amagara ari yo aza imbere ya vyose.

Mu gihe naho hogira uwubirengako akaza mu Burundi, ngo azokwakirwa ariko ace ashirwa ahawenyene ikiringo c'iminsi cumi n'ine.

U Burundi ni co gihugu conyene mu karere kitaragaragaramwo uwanduye coronavirus, ariko hari abakekwa bamaze gufatwa ibipimo.

Co kimwe no mu bindi bihugu, abari mu Burundi bahanurwa gukaraba intoke kenshi no kwirinda kwegerana ari benshi.

Mu kiganiro yagiranye na Prudent Nsengiyumva wa BBC, umushikiranganji Ezechiel Nibigira yatanguye asigura icatumye iyo ngingo yo guhagarika gutanga visa ifatwa (ushobora kwumva ico kiganiro aho hejuru).

Ushobora gusoma kandi: