Ubumwe bwa Afurika buri ku ruhande rwa OMS ku byo Trump ayishinja

Perezida wa komisiyo y'Ubumwe bwa Afurika

Ahavuye isanamu, AU

Insiguro y'isanamu,

Perezida wa komisiyo y'Ubumwe bwa Afurika

Nyuma y'ibyavuzwe na Perezida Donald Trump, Perezida wa komisiyo y'Ubumwe bwa Afurika yatangaje ko iri shyirahamwe ry'ibihugu rishyigikiye ibikorwa n'ishami rya ONU ryita ku buzima (OMS/WHO) mu kurwanya coronavirus yabaye icyorezo ku isi.

Mu kiganiro n'abanyamakuru ejo kuwa kabiri ,Perezida Donald Trump yavuze ko OMS/WHO yabagiriye inama mbi, ndetse yitaye cyane ku Bushinwa mu kurwanya iki cyorezo.

Bwana Trump yatangaje ko "WHO, ku mpamvu runaka, nubwo iterwa inkunga nini na Amerika, yibanze cyane ku Bushinwa" Ati: "Ibi tuzabisubiramo".

Bwana Trump avuga ko yanze inama mbi yagiriwe na WHO yo gukomeza gufungura imipaka yayo ku Bushinwa.

Moussa Faki Mahamat, Perezida wa komisiyo y'Ubumwe bwa Afurika yanditse kuri Twitter ko "yatunguwe no kubona hari inkubiri ya leta ya Amerika yo kurwanya WHO mu bikorwa iyoboye ku isi".

Bwana Faki yavuze ko umuryango w'ubumwe bwa Afurika ushyigikiye WHO n'umuyobozi wayo Dr Tedros Ghebreyesus.

Akavuga ko ubu "abatuye isi bakwiye gushyira hamwe mu kurwanya Covid-19". Ko igihe cyo kubaza abantu ibyo bakoze kizaza nyuma.

Kuri Twitter, ibyavuzwe na Bwana Trump bamwe babishyigikiye abandi barabinenga, bamwe bavuze ko leta ye itafashe ingamba zo kwirinda kare.

Leta zunze ubumwe za Amerika ubu nicyo gihugu gifite abantu benshi ku isi banduye Covid-19 bamaze kumenyakana, bararenga 400,000 ,imaze kwica abarenga 12,000.

OMS/WHO ntacyo iratangaza ku byavuzwe na Bwana Trump.

Perezida Paul Kagame w'u Rwanda, yasubije ashyigikira ibyavuzwe na Moussa Faki Mahamat, abaza niba ari Dr.Tedros, WHO, cyangwa Ubushinwa bugarijwe n'iki cyorezo gusa, cyangwa ari bose.

Bwana Kagame avuga ko imbaraga zikwiye gushyirwa mu kurwanya iki cyorezo, abafite ibyo bakoze bakazabibazwa nyuma. Ati: "Mudukize politiki nyinshi Africa ntibikeneye".