DR Congo: Kuki Vital Kamerhe umuyobozi w’ibiro bya Félix Tshisekedi yafunzwe?

Vital Kamerhe ni umuyobozi w'ishyaka UNC ritavuga rumwe n'ubutegetsi, mu 2018 yifatanyije na Félix Tshisekedi mu matora y'umukuru w'igihugu

Ahavuye isanamu, AFP

Insiguro y'isanamu,

Vital Kamerhe ni umuyobozi w'ishyaka UNC ritavuga rumwe n'ubutegetsi, mu 2018 yifatanyije na Félix Tshisekedi mu matora y'umukuru w'igihugu

Nta makuru arambuye aratangwa n'inzego z'ubutabera muri Repubulika ya demokarasi ya Congo, ikimaze kwemezwa ni uko nyuma yo guhatwa ibibazo ejo kuwa gatatu nijoro yahise ajyanwa muri gereza nkuru ya Makala i Kinshasa.

Vital Kamerhe ni umuyobozi w'ibiro bya Perezida Félix Tshisekedi kuva mu kwezi kwa mbere 2019, nyuma y'amasaha ane abazwa n'umucamanza yari yitabye, yahise afungwa.

Umunyamakuru wa BBC i Kinshasa avuga ko kuwa mbere aribwo Bwana Kamerhe yari kwitaba umucamanza ariko ntiyajyayo kuko ibaruwa imuhamagaza yarimo amakosa ku itariki.

Bwana Kamerhe w'imyaka 59, yahamagajwe ngo abazwe ibijyanye n'imishinga y'ibikorwa remezo ya Perezida Tshisekedi yise "programme d'urgence de 100 jours".

Iyi ni imishinga yihutirwa y'ubwubatsi bw'ibikorwa byari bikenewe cyane na mbere y'uko hashyirwaho guverinoma, ubwo Bwana Tshisekedi yari amaze gutsinda amatora mu mpera za 2018.

Bwana Kamerhe, umugabo wavukiye i Bukavu mu burasirazuba bwa Congo, niwe wategekaga ibikorwa muri iyi mishinga.

Ntabwo biramenyekana neza niba yarahamagajwe n'umucamanza ngo atange amakuru cyangwa se amenyeshwe ibyo aregwa.

Gusa imiryango itegamiye kuri leta n'abatavuga rumwe nayo bamaganye ruswa ikabije mu itangwa ry'amasoko kuri kompanyi zakoraga ibikorwa muri iyo mishinga.

Umunyamakuru wa BBC avuga ko hari abantu bayobora za kompanyi zigenga n'iza leta bafunze baregwa kunyereza umutungo wa leta muri iyi mishinga, myinshi muri yo ikaba itararangiye.

Ni muntu ki Kamerhe?

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Ubwo yari umunyeshuri muri kaminuza ya Kinshasa mu 1984, nibwo Vital Kamerhe Lwa Kanyiginyi Nkingi yatangiye politiki mu ishyaka UDPS ryari irya Étienne Tshisekedi wa Mulumba.

Guhera mu myaka ya 1990 yatangiye kubona imyanya ya politiki muri leta. Bikekwako yaba yari ashyigikiye Perezida Mobutu Sese Seko nubwo yagiye aba mu mashyaka atavuga rumwe n'ubutegetsi bwe.

Ku butegetsi bwa Laurent-Désiré Kabila nabwo yahawe imyanya itandukanye ya politiki.

Mu 2002 yagize uruhare runini mu biganiro bigamije gushaka amahoro mu burasirazuba bwa DR Congo.

Mu 2004 yagize uruhare mu kwamamaza Joseph Kabila no kumugeza ku ntsinzi mu matora, nawe atorerwa kuba umudepite i Bukavu, mu 2006 atorerwa kuba Perezida w'inteko ishinga amategeko.

Icyo gihe yari mu ishyaka PPRD yagize uruhare mu gushinga riyoborwa na Joseph Kabila Kabange.

Mu 2009 yashwanye na Perezida Joseph Kabila, avuga ko guverinoma yemereye ingabo z'u Rwanda kwinjira muri "operations Umoja Wetu" mu burasirazuba bwa Congo, itabimenyesheje Inteko.

Muri uwo mwaka yeguye ku mwanya we, mu 2011 yiyamamarije kuba Perezida wa Repubulika mu ishyaka rye UNC, aratsindwa ku majwi 7% yabonye.