Jeannot Witakenge, 'umwe mu bakinnyi b'ibihe byose Rayon Sports yagize', yapfuye

Jeannot Witakenge yatwaye ibikombe bine bya shampiyona akinira Rayon Sports
Insiguro y'isanamu,

Jeannot Witakenge yatwaye ibikombe bine bya shampiyona akinira Rayon Sports

Jeannot Witakenge, umugabo wamamaye cyane akina muri Rayon Sports na APR FC mu Rwanda, yaraye apfuye aho yari arwariye mu bitaro by'i Bukavu muri DR Congo nk'uko umuvugizi w'ikipe ya Rayon Sports abyemeza.

Witakenge, Umunyecongo wari mu kigero cy'imyaka 50 y'amavuko, yari anafite ubwenegihugu bw'u Rwanda nyuma yo kuhakinira igihe kinini no gukinira ikipe y'igihugu Amavubi.

Ari mu bakinnyi bakina hagati baranze umupira w'amaguru mu Rwanda kuva mu myaka ya 1990 kugeza ahagaritse gukina.

Jean Paul Nkurunziza, umuvugizi wa Rayon Sports - ikipe Witakenge yakiniye mu bihe bitandukanye kuva mu 1990 kugeza mu 2004 - yabwiye BBC ko amakuru y'urupfu rwa Witakenge bayabwiwe n'abari bamurwaje, barimo uwo bakinanye Mbusa Kombi Billy na we wakinnye muri Rayon.

Umwaka ushize nibwo byamenyekanye ko Jeannot Witakenge yarwaye cancer y'igifu, akaba yavurirwaga i Bukavu, ahaba kandi umuryango we.

Nkurunziza avuga ko icyo gihe ikipe ya Rayon Sports n'abafana bayo bakusanyije ubufasha bakabumwoherereza ngo avurwe.

Ahavuye isanamu, Rayon sports

Insiguro y'isanamu,

Jeannot Witakenge (wa gatatu mu bicaye uvuye ibumoso) yakiniye Rayon Sports kuva mu myaka ya 1990

'Umwe mu bakinnyi b'ibihe byose'

Nkurunziza avuga ko Rayon Sports ibuze umuntu wabaye ingenzi mu mateka y'iyi kipe.

Ati: "Ni umuntu dufata nk'umunyabigwi wacu, nta mukinnyi urageza ku rwego nk'urwe mu bakina hagati.

"Usibye ibyo yakoreye ikipe, twibuka ko nko mu 2000 hari igihe abakinnyi bigeze kubura tugiye gukina na Kibuye FC, ubwe arahaguruka ashakisha abakinnyi bakina ari barindwi.

"Uwo mukino waje no gusubikwa ugeze hagati ariko ntitwaterwa mpaga nk'uko byari bigiye kuba.

"Tumufata nk'umuntu witangiye ikipe ari umukinnyi, ni umuntu dufata nk'umwe mu bakinnyi b'ibihe byose Rayon Sports yagize".

Witakenge ni inde?

Jeannot Witakenge yageze muri Rayon Sports mu myaka ya 1990 avuye muri Espoir FC yabaga mu cyahoze ari Cyangugu, mu 1994 haba Jenoside mu Rwanda yagiye gukina muri Inter Star y'i Burundi.

Yasubiye muri Rayon Sports mu 1996, amateka yerekana ko yatwaranye n'iyi kipe ibikombe bya shampiyona ya 1997, 1998, 2002 na 2004.

Witakenge yari mu ikipe ya Rayon Sports yo mu 1998 yatwaye igikombe cya CECAFA, igikuye muri Zanzibar.

Ahavuye isanamu, Rayon Sports

Insiguro y'isanamu,

Ikipe ya Rayon Sports mu bihe yari kumwe na Jeannot Witakenge

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Kuri iyi foto,abahagaze (kuva ibumoso ugana iburyo): Billy Mbusa Kombi Jeannot Witakenge, Zappy Molla, Hamad Katauti, Jimmy Gatete, Mohamoud Mossi

Abapfukamye: Djuma, Hategekimana Dieudonné bitaga Ninja, Ndikumana Magnifique, Mupenzi Leon,Arafu Bulanga

Abicaye: Seko Sefu, Daudi Shaban, Yves Mudeyi, Kanyinda, Saidi Ndabaniwe na Thierry Hitimana.

Witakenge yatwaye ibikombe bya shampiyona kandi bya 2006 na 2007 akinira APR FC.

Witakenge yavuye muri APR FC mu 2009 ajya gukina muri Saint-Éloi Lupopo yo muri DR Congo aho yanasoreje ibyo gukina agatangira gutoza.

Mu 2018 yagizwe umutoza wa Rayon Sports wungirije Olivier Karekezi, nyuma ya Karekezi haza Umubiligi Ivan Minnaert, uyu amaze gusezererwa Witakenge yatoje Rayon amezi abiri nk'umutoza mukuru.

Nkurunziza avuga ko nubwo Witakenge atahiriwe n'urugendo rw'ubutoza, ariko Rayon Sports imufata nk'umuntu wagiriye akamaro cyane iyi kipe.

Avuga ko komite y'ikipe ya Rayon Sports iza kuganira uko yafatanya n'abafana bayo bagafasha umuryango wa Witakenge muri ibi byago.