Tanzania: Freeman Mbowe ukuriye CHADEMA yatezwe igico 'arakubitwa bikomeye'

Freeman Mbowe, hagati, ishyaka rye rivuga ko yatezwe igico

Ahavuye isanamu, Getty Images

Insiguro y'isanamu,

Freeman Mbowe, hagati, ishyaka rye rivuga ko yatezwe igico

Freeman Mbowe ukuriye ishyaka ritavuga rumwe n'ubutegetsi muri Tanzania CHADEMA yakubiswe n'abantu bataramenyekana baramukomeretsa mu murwa mukuru Dodoma, ubu ari kuvurirwa mu bitaro byo muri uyu mujyi.

Ishyaka rye rivuga ko Bwana Mbowe ubwo yariho ataha iwe mu rugo i Dodoma mu ijoro ryakeye yatezwe igico agakubitwa bikomeye nk'uko umunyamakuru wa BBC abivuga.

Byabaye hashize amasaha macye Tundu Lissu, undi munyapolitiki uzwi cyane wo muri iri shyaka, atangaje umugambi we wo guhatanira umwanya w'umukuru w'igihugu.

Tundu Lissu we ari mu Bubiligi aho yagiye kwivuriza nyuma yo kurokoka igikorwa cyo gushaka kumwica mu 2017.

Ishyaka CHADEMA ryatangaje ko uyu munsi risohora itangazo ry'amakuru arambuye ku byabaye ku urikuriye, gusa rivuga ko ari igikorwa gifite impamvu za politiki.

Polisi ya Tanzania ntacyo iratangaza ku byakorewe Bwana Mbowe.

Tanzania iritegura amatora y'umukuru w'igihugu mu kwezi kwa 10 uyu mwaka, biteganyijwe ko Perezida John Pombe Magufuli aziyamamariza kongera gutorerwa indi manda.