'Nta coronavirus iri muri Malawi' - Joyce Banda wahoze ari Perezida

Mu mezi atatu ashize, Madamu Banda yashinjaga leta ya Malawi guhisha ko hari abarwayi ba coronavirus muri icyo gihugu

Ahavuye isanamu, AFP

Insiguro y'isanamu,

Mu mezi atatu ashize, Madamu Banda yashinjaga leta ya Malawi guhisha ko hari abarwayi ba coronavirus muri icyo gihugu

Joyce Banda wahoze ari Perezida wa Malawi yabwiye imbaga y'abitabiriye ibikorwa byo kwiyamamaza kwe ko iki gihugu nta murwayi wa coronavirus ukirimo ndetse ashinja leta "guhimba" imibare, nkuko ibitangazamakuru byaho bibivuga.

Abanyapolitike bari kwiyamamaza mbere y'isubirwamo ry'amatora ya perezida riteganyijwe kuba ku itariki ya 23 y'uku kwezi kwa gatandatu, nyuma yaho kongera gutorwa kwa Perezida Peter Mutharika mu mwaka ushize guhinduwe impfabusa n'inkiko.

Ibikorwa byo kwiyamamaza byitabirwa n'imbaga y'abantu, byirengagije ingamba zo kwirinda ikwirakwira ry'ubwandu bwa coronavirus zirimo nko kutegerana no kwambara agapfukamunwa.

Ikusanyabitekerezo riheruka gukorwa rigaragaza ko 81% by'abaturage ba Malawi badafite ubwoba bwa coronavirus ahubwo bahangayikishijwe kurushaho n'inzara.

Urubuga rw'amakuru rwa Malawi24 rutabogamiye kuri leta rusubiramo amagambo ya Madamu Banda ejo ku wa kabiri ari mu mujyi wa Nkhata Bay abwira abamushyigikiye ati:

"Kubw'ibyo, turasaba ko amafaranga yose y'inkunga yahawe Malawi mu izina ryo kurwanya Covid-19 ahabwa ba nyirayo b'ukuri agakoreshwa mu mishinga y'amajyambere".

Mu mezi atatu ashize, Madamu Banda yashinjaga leta ya Malawi guhisha ko hari abarwayi ba coronavirus muri icyo gihugu.

Mu matora aheruka, uyu wahoze ari Perezida yari yashyigikiye Lazarus Chakwera utavuga rumwe n'ubutegetsi.

Kugeza ubu, leta ya Malawi imaze kwemeza ko abantu 455 banduye coronavirus, bane muri bo yarabishe naho 55 barayikize.