SolO: Icyogajuru cy'uburayi uyu munsi kiraca ‘hafi cyane y’izuba’

Ubushakashatsi bw'iki cyogajuru

Ahavuye isanamu, European Space Agency

Insiguro y'isanamu,

Ubushakashatsi bw'iki cyogajuru bugamije kwiga uko izuba rigira ingaruka ku ikoranabuhanga

Icyogajuru cyakorewe gukora ubushakashatsi ku zuba (Solar Orbiter) uyu munsi kuwa mbere kiranyura hafi cyane y'izuba, kiraza kuba kiri ku ntera ya kilometero miliyoni 77 gusa.

Iki cyogajuru kizwi nka SolO cyagiye mu isanzure mu kwezi kwa kabiri uyu mwaka gifite ubutumwa bwo kugenzura imikorere y'iyi nyenyeri yacu.

Mu myaka iri imbere, iki cyogajuru SolO kizakomeza kugenda cyegera izuba kurushaho, rimwe na rimwe kizajya kigera ku ntera ya kilometero miliyoni 43.

Kugeza ubu, ubundi butumwa butanu bw'ibi byogajuru by'Uburayi mu isanzure bwagiye bugerageza kwegera izuba ariko nta kiragera aho SolO iri bugera uyu munsi kuwa mbere.

Isi yikaraga iruhande rw'izuba ku ntera iri ku ntera ya kilometero miliyoni 149 uvuye ku zuba.

SolO ni icyogajuru cyakozwe na European Space Agency (Esa) cyateranyirijwe mu Bwongereza na kompanyi ya Airbus.

Kimaze amezi ane ya mbere mu isanzure mu igerageza.

Imirimo ihoraho cyakorewe iracyabura igihe kigera ku mwaka ngo gitangire kuyikora neza.

Prof Tim Horbury ukuriye itsinda ry'abashakashatsi bo kuri Imperial College London bacyohereje, avuga ko kiri kubaha amakuru menshi ku mikorere ya za rukuruzi n'imiyaga.

Icyogajuru cy'Abanyamerika Parker Solar Probe nacyo kiri mu butumwa nk'ubu aho gifite intego yo kugera hafi y'izuba kurushaho, tariki 07 z'uku kwezi kwa gatandatu cyaciye hafi y'izuba ku ntera ya kilometero miliyoni 19.