Kim Jong-un yasabye abategetsi kuba maso kubera umuyaga ukaze na Covid-19

Kim Jong-un ayoboye inama ku itariki ya 25 y'uku kwezi kwa munani

Ahavuye isanamu, Getty Images

Kim Jong-un, umutegetsi mukuru wa Koreya ya ruguru, yaburiye abategetsi b'iki gihugu abasaba kwitegura ibyago biturutse ku cyorezo cya coronavirus n'umuyaga ufite imbaraga.

Bwana Kim yagaragaye ayoboye iyo nama, nyuma yuko hari hashize igihe hahwihwiswa ko ubuzima bwe bwaba butameze neza.

Koreya ya ruguru ntabwo iremeza umuntu n'umwe urwaye Covid-19 kandi byibazwa ko iki cyorezo cyashegesha iki gihugu gicyennye mu gihe cyaba kihageze.

Hagati aho byitezwe ko umuyaga ukaze wiswe 'Bavi' wibasira Koreya ya ruguru muri iki cyumweru.

Ejo ku wa kabiri avugira mu nama ya biro politike y'ishyaka riri ku butegetsi, Bwana Kim, watumuraga itabi ry'isigareti, yavuze ko hari "bimwe bitagenda neza" mu ngamba zo kugumisha hanze y'iki gihugu iyi "virusi mbi", nkuko byatangajwe n'igitangazamakuru cya leta.

Nta yandi makuru arenzeho icyo gitangazamakuru cya leta cyatangaje.

Hashize igihe Koreya ya ruguru ikomeza gushimangira ko nta banduye coronavirus barangwa muri iki gihugu, nubwo bamwe mu bakurikiranira hafi iby'iki gihugu batabishira amakenga.

Nta muntu n'umwe Koreya ya ruguru iremeza ko yanduye coronavirus, ariko ubu hashize ibyumweru byinshi igitangazamakuru cya leta kidasubiramo iyo ntero.

Nyuma yuko mu kwezi gushize hari uwacyetswe ko yaba yarayanduye, umujyi wa Kaesong wo ku mupaka hafi ya Koreya y'epfo wari washyizwe muri gahunda ya 'guma mu rugo', ariko ntabwo byigeze na rimwe byemezwa n'abategetsi ko uwo muntu yayanduye.

Kwigaragaza kwa Kim Jong-un kubaye mu gihe hahwihwiswaga byinshi ku buzima bwe, bamwe bavuga ko yanahaye ububasha bumwe mushiki we Kim Yo-jong.

Uko guhwihwisa ku buzima bw'uyu mutegetsi mukuru wa Koreya ya ruguru si ibintu bishya, ariko kugeza ubu byamye nta kuri kwabyo.