DR Congo: Denis Mukwege arashima UN ko ingabo zayo zagarutse kubarinda

Denis Mukwege yahawe igihembo cy'amahoro cyitiriwe Nobel cya 2018

Ahavuye isanamu, Getty Images

Insiguro y'isanamu,

Denis Mukwege yahawe igihembo cy'amahoro cyitiriwe Nobel cya 2018

Dr Denis Mukwege yavuze ko ku bitaro akuriye bya Panzi i Bukavu hongeye koherezwa ingabo za UN zo kuhacungira umutekano nyuma y'uko uyu muganga avuze ko ubuzima bwe buri mu kaga.

Bwana Mukwege wahawe igihembo cy'amahoro cyitiriwe Nobel mu 2018, yashimiwe umuhate we mu gufasha no kuvura abagore bafashwe ku ngufu mu ntambara ziba mu burasirazuba bwa Congo.

Mu kwezi kwa karindwi, yavuze ko hashize igihe aterwa ubwoba ko azicwa, kubera ko asaba ubucamanza ku byaha byakorewe mu burasirazuba bwa Congo mu myaka yashize.

Bwana Mukwege akunze kumvikana asaba ubucamaza ku bwicanyi (1993 - 2003) bwahitanye miliyoni z'abantu buvugwa na 'Mapping Report' yakozwe n'inzobere za ONU.

Iyo raporo yavuze ko ingabo z'u Rwanda zabugizemo uruhare, raporo u Rwanda rwahakanye.

Bwana Mukwege yumvikana kandi yamagana ubwicanyi bukorwa muri iki gihe cya vuba mu burasirazuba bwa Congo.

Mu kwezi gushize, ishyirahamwe ry'abaganga baharanira uburenganzira bwa muntu ryasabye ko Denis Mukwege, umwe mu barigize, ingabo za MONUSCO "zirushaho kumurinda no kongerera umutekano abakozi b'ibitaro bye".

Mu myaka yashize, ingabo za MONUSCO ziri muri DR Congo zarindaga ibitaro bya Panzi, ariko nyuma zaje kuhava.

Mu ijoro ryo kuwa gatatu, Bwana Mukwege yanditse kuri Twitter ashimira ko kuva kuri uwo munsi mu gitondo "ingabo za UN zongeye koherezwa kuri ibi bitaro kuturinda".

Mu kwezi gushize, Michelle Bachelet, umunyamabanga mukuru w'ishami rishinzwe uburenganzira bwa muntu muri ONU/UN, yasabye leta ya DR Congo gukora iperereza kw'iterabwoba ryo kwicwa rikorerwa Denis Mukwege.