Nigeria: Umuherwe Femi Otedola yatangaje benshi aha abakobwa be imodoka za Ferrari

Se wa DJ Cuppy witwa Femi Otedola yahaye impano ya Ferrari Portofino abakobwa be

Ahavuye isanamu, DJ Cuppy

Amakuru y'uko uyu muherwe witwa Otedola yaguriye abana be izi modoka zihenze cyane yatumye benshi bayavugaho ibitandukanye.

Femi Otedola, uzwi mu bucuruzi bw'ibitoro, yatunguye abakobwa be batatu abagurira imodoka zo mu bwoko bwa Ferrari Portofino.

Florence Ifeoluwa Otedola uzwi cyane ku izina rya DJ Cuppy ejo kuwa gatatu yatangaje ku mbuga nkoranyambaga amafoto y'izo modoka se yabaguriye.

Yavuze ko se yaguriye imodoka eshatu abakobwa be batatu - Tolani, Temi na Ifeoluwa Otedola.

Umuherwe Femi Otedola abarirwa umutungo ugera kuri miliyari 1.85 y'amadorari ya Amerika.

Kuri Twitter umukobwa we Temi yanditse ati: "Data yatujyanye mu iguriro aho yatuguriye buri wese iye".

Amakuru kuri izi modoka

Ferrari Portofino ku isoko ibarirwa agaciro kagera ku $218,750 (Ni agera kuri miliyoni 210 mu manyarwanda).

Iyi imodoka ntoya yo mu bwoko bwa V8, igira ubushobozi bwo kuvuduka bugera kuri 320 km/h.

Ku mbuga nkoranyambaga abantu benshi batangajwe n'iyo mpano y'umubyeyi ku bana be bayivugaho ibinyuranye.

Ahavuye isanamu, DJ Cuppy

Insiguro y'isanamu,

Abakobwa ba Otedola: Tolani, Temi na Ifeoluwaburi wese yamuguriye Ferrari Portofino ye

Basubiza ku byatangajwe n'aba bakobwa, umwe yagize ati: "Ibi ni ugusesagura amafaranga ya rubanda! Yari kuyaha abakene. Nizeye ko EFCC izabikoramo iperereza".

Economic and Financial Crimes Commission (EFCC) ni komisiyo ya leta ya Nigeria ikora iperereza ku byaha by'ubukungu n'imari.

Undi yasubije ati: "Ibyo birebaho iki EFCC? Umuntu aguriye abana be ibintu none urashaka ko haba iperereza?...koko!!!"

Undi yagize ati: "Umugabo ugurira Ferrari eshatu abana be! Umugabo nka Otedola niwe nshaka kuba. Cuppy niteguye gufata irindi zina ryawe".

Ahavuye isanamu, DJ Cuppy

Ahavuye isanamu, DJ Cuppy