Rwanda: Urukiko rutegetse ko Paul Rusesabagina akomeza gufungwa

Rusesabagina mu rukiko

Ahavuye isanamu, Getty Images

Urukiko rw'ibanze rwa Kagarama mu mujyi wa Kigali rumaze gutegeka ko Paul Rusesabagina uregwa ibyaha 13 bigendanye n'iterabwoba akomeza gufungwa by'agateganyo.

Umucamanza yavuze ko hari ibimenyetso bikomeye ku byaha 13 Bwana Rusesabagina aregwa, bityo akwiye gukomeza gufungwa by'agateganyo iminsi 30 ngo "atabangamira iperereza".

Umunyamakuru wigenga wari mu rukiko yabwiye BBC ko umucamanza amaze kuvuga ibi, Bwana Rusesabagina ubwe yahise asaba ijambo. Avuga ko ajuririye iki cyemezo.

Mu ibunirasha riheruka, uruhande rwe rwari rwasabye ko arekurwa agakurikiranwa adafunzwe kubera impamvu zirimo uburwayi.

Ubushinjacyaha bwari bwasabye ko akomeza gufungwa, buvuga ko hasanzwe hari uburyo abafunze barwaye bavurwa.

Icyemezo cy'urukiko cy'uyu munsi ku wa kane kivuze ko Bwana Rusesabagina ashobora guhita ajya gufungirwa muri imwe muri gereza zo mu Rwanda.

Kuva mu byumweru birenga bibiri bishize yerekanwa ko yafashwe, mu buryo butavugwaho rumwe, Bwana Rusesabagina yari afungiwe kuri sitasiyo ya polisi.

Rusesabagina yamenyekanye nyuma yo gushingirwaho inkuru ya filimi Hotel Rwanda y'abemeje ko yabarokoye muri Jenoside yo mu Rwanda.

Aregwa ibyaha bishingiye ku bitero by'umutwe wa FLN ku Rwanda mu 2018 na 2019, byaguyemo abantu mu turere twa Nyaruguru na Nyamagabe, ahegereye ishyamba rya Nyungwe.

Umutwe wa FLN ni ishami rya gisirikare ry'impuzamashyaka MRCD-Ubumwe, Bwana Rusesabagina abereye umukuru wungirije.