Armenia – Azerbaijan: Uburusiya bwitanzeho umuhuza mu biganiro by'amahoro

Ifoto ya minisiteri y'ingabo z'Armenia yerekana umusirikare wayo mu mirwano n'ingabo z'Azeribaijan ku itariki ya 30 y'ukwa cyenda 2020

Ahavuye isanamu, EPA

Insiguro y'isanamu,

Ifoto ya minisiteri y'ingabo z'Armenia yerekana umusirikare wayo mu mirwano n'ingabo z'Azeribaijan ku itariki ya 30 y'ukwa cyenda 2020

Uburusiya bwavuze ko bushaka kwakira ibiganiro bigamije amahoro byo gusoza imirwano hagati y'ingabo z'Armenia n'iz'Azerbaijan mu karere zipfa ka Nagorno-Karabakh.

Minisitiri w'ububanyi n'amahanga w'Uburusiya Sergei Lavrov yabivuze nyuma yo kuganira na leta zombi, nkuko ibiro bye byabitangaje.

Byongeyeho ko yasabye impande zombi "guhagarika imvugo imeze nk'iyo mu ntambara".

Abantu barenga 100 bamaze gupfira muri iyo mirwano kuva yatangira ku cyumweru.

Iyi ni yo mirwano ya mbere ikaze cyane ibayeho mu myaka myinshi ishize yo kurwanira akarere ka Nagorno-Karabakh.

Ako karere, kazwi mu mategeko ko ari ak'Azerbaijan, gategekwa n'abo mu bwoko bw'abanya-Armenia.

Armenia na Azerbaijan - zahoze ari repubulika ebyiri mu zari zigize Leta Zunze Ubumwe z'Abasoviyeti (Uburusiya bw'ubu) - byarwaniye ako karere mu ntambara yo guhera mu 1988 kugera mu 1994.

Hari ubwoba bukomeje kwiyongera ko ibihugu by'amahanga byakwivanga muri iyi mirwano.

Ahavuye isanamu, EPA

Ejo ku wa gatatu, ibiro bya Bwana Lavrov byatangaje ko yahamagaye ba minisitiri w'ububanyi n'amahanga b'Armenia n'Azerbaijan ababwira ko Uburusiya bufite ubushake bwo kwakira ibiganiro by'amahoro hagati y'impande zombi.

Perezida Vladimir Putin w'Uburusiya yaganiriye na Perezida Emmanuel Macron w'Ubufaransa kuri iyo mirwano, mu kindi kiganiro cyo kuri telefone.

Aba ba perezida bombi bongeye gushimangira ubusabe bw'ibihugu bikomeye ku isi bwuko imirwano ihita ihagarara hakaba agahenge.

Uburusiya bufitanye amasezerano ya gisirikare n'Armenia ndetse bufite ikigo cya gisirikare muri icyo gihugu. Ariko, bunafitanye umubano wa hafi na leta y'Azerbaijan.

Armenia ishyigikiye aka karere ka Nagorno-Karabakh, kitangaje ko ari repubulika, ariko nta na rimwe Armenia yigeze yemera ku mugaragaro ko ako karere ari repubulika.

Ntiharamenyekana icyatangije iyi mirwano.