Paul Rusesabagina: Umuryango we n'umunyamategeko we bavuga ko ibyo ari kuvuga ari ibyo yategetswe

Paul Rusesabagina yagaragaye mu rukiko yambaye umwenda w'abafungiye muri gereza zo mu Rwanda
Insiguro y'isanamu,

Uyu munsi hashize ukwezi Paul Rusesabagina yerekanywe ko afungiye mu Rwanda, mu cyumweru gishize yagaragaye yambaye umwenda w'abafungiye muri gereza

Umwe mu banyamategeko bashyizweho n'umuryango we hamwe n'abana be bavuze ko ibyo Paul Rusesabagina ari kuvuga muri iki gihe yafashwe ari ibyo ategekwa n'ubutegetsi.

Mu kiganiro n'abanyamakuru uyu munsi ku wa kane, aba basubiyemo ko bemeza ko Bwana Rusesabagina yashimuswe akajyanwa mu Rwanda, bahakana uruhare rwe mu bitero byakozwe na FLN ku Rwanda bikicirwamo abantu.

Kuri uyu wa gatanu, urukiko rwisumbuye mu Rwanda ruratangaza icyemezo ku bujurire bwa Bwana Rusesabagina ku ifungwa n'ifungurwa ry'agateganyo.

Bwana Rusesabagina aregwa ibyaha 13 bigendanye n'iterabwoba n'ubufatanyacyaha cy'ubwicanyi, bishingiye ku bitero byakozwe n'umutwe wa FLN.

Muri iki kiganiro cyari kirimo abana batanu ba Bwana Rusesabagina, bavuze ko abanyamategeko yahitiwemo n'umuryango we bagerageje ariko leta y'u Rwanda yabangiye ko bamuburanira.

Umwe mu bakobwa be Anaïse Kanimba yagize ati: "Inshuro zose Gatera Gashabana [umwe mu bagize itsinda bamuhitiyemo] yashatse kujya kumureba ntibamwemereye kuko leta ifite abo yamuhitiyemo tutemera kuko batigenga".

Bazi uko yagejejwe mu Rwanda?

Umuhungu we Roger Rusesabagina, yavuze ko ubwo bavuganye na se kuri telefone afunze bakamubaza uko yageze mu Rwanda yababwiye ko ari kumwe n'abanyamategeko, ati: "Ni nk'aho yatubwiye ati 'muragira ngo mbabwire iki ko ntisanzuye?'".

Kuri iki kibazo ngo yabasubije gusa ko yafashe indege ari i Dubai agakanguka ari i Kigali.

Bwana Rusesabagina aho yari afungiye yabwiye ikinyamakuru New York Times ko indege y'abantu ku giti cyabo yari arimo yari igiye i Bujumbura mu Burundi akisanga yageze i Kigali. Ibi bo ntibabyemera.

Anaïse Kanimba ati: "Tuzi ko biriya avuga atari we, ni ibyo leta yateguye kandi yakorewe iyicarubozo ngo abivuge uko babishaka, ni yo mpamvu dushaka ko agira abamwunganira bigenga umuryango we watoranyije."

Umunyamategeko Peter Robinson uri mu itsinda ryo kumuburanira ryashyizweho n'umuryango we, avuga ko Bwana Rusesabagina atunganiwe uko abyifuza kandi ibyo avuga mu rukiko atari ukuri kwe.

Insiguro y'isanamu,

Abana ba Paul Rusesabagina, umwunganizi washyizweho n'umuryango we n'umuvugizi w'ishyirahamwe rifasha yashinze, mu kiganiro n'abanyamakuru

Babajijwe impamvu atanze abunganizi yahawe niba ashaka abo umuryango wamuhitiyemo, Roger Rusesabagina yagize ati: "Ni byo ntiyanze abari kumwunganira kuko ibyo akora byose ni ibyo yategetswe kubera uko yashimuswe, nta cyo yakora uretse kwemera ibyo leta imuhaye."

Kuba ubugenzacyaha bwaravuze ko Rusesabagina yafashwe ku bufatanye n'amahanga, nyuma Perezida Kagame akavuga ko "yashutswe agakurikira inkuru yemera" akisanga mu Rwanda, aba bavuze ko byerekana ko yashimuswe.

Bwana Rusesabagina mu rukiko yemeye ko "bashinze umutwe wa FLN utagamije gukora iterabwoba". Uyu mutwe wagabye ibitero mu Rwanda mu 2018 na 2019 byiciwemo abantu.

Muri iki kiganiro abo ku ruhande rwe bavuze ko nta bubasha yari afite ku bikorwa bya FLN, umutwe w'inyeshyamba w'impuzamashyaka MRCD-Ubumwe, Rusesabagina abereye umukuru wungirije.

Kagame 'uri muri US', icyo bamusaba

Uwari uyoboye iki kiganiro, Madamu Kitty Kurth, umuvugizi wa Hotel Rwanda Rusesabagina Foundation, yavuze ko bamenye ko Perezida Paul Kagame uyu munsi yageze muri Amerika "kandi ashobora kubonana n'abashinzwe ububanyi n'amahanga bwa Amerika".

Anaïse Kanimba yavuze ko icyo basaba Bwana Kagame ari ukurekura Rusesabagina "kuko arwaye umuvuduko w'amaraso, kandi afite amagara yoroheje ageramiwe muri iki gihe cya Covid-19."

Kuri ibi, urukiko mu Rwanda rwategetse ko Bwana Rusesabagina niba arwaye azakurikiranwa nk'uko abandi bantu bafunze mu Rwanda amagara yabo yitabwaho.

Muri iki kiganiro Patrick J.Kennedy wahoze ari umudepite mu nteko ishingamategeko ya Amerika yavuze ko "anenga kuba ubutegetsi bw'u Rwanda bwarafashe Paul Rusesabagina binyuranyije n'amategeko ntihagire ubibubaza".

Bwana Kennedy yavuze ko asaba leta ya Amerika kugira icyo ikora ku kibazo cye.