Rwanda: Imibare y'abandura Covid igenda igabanuka, imikino n'amashure bigiye gusubukurwa

Umukozi wo muri laboratoire y'ikigo cy'ubuzima cy'u Rwanda apima ibipimo bya Covid-19. Mu kwa munani hafatwaga ibipimo biri hagati ya 3,000 na 6,000 ku munsi

Ahavuye isanamu, Getty Images

Insiguro y'isanamu,

Umukozi wo muri laboratoire y'ikigo cy'ubuzima cy'u Rwanda apima ibipimo bya Covid-19. Mu kwa munani hafatwaga ibipimo biri hagati ya 3,000 na 6,000 ku munsi

Inzego z'ubuzima mu Rwanda zitangaza ko ku wa gatatu abantu 162 basohotse mu bitaro bakize Covid-19, umwe mu mibare yo hejuru ibonetse y'abakiriye rimwe kuva iki cyorezo cyakwaduka mu mezi 6 ashize.

Ministeri y'ubuzima ivuga ko umubare w'abandura ugenda ugabanuka muri iyi minsi, cyakora igasaba abaturage kutirara.

Abamaze gukira iyi virusi kugeza ejo ku wa kane bagera ku 3,542 naho abo imaze kwica ni 29. Abayanduye bose hamwe bagera ku 4,885.

Abashinzwe ubuzima mu Rwanda bavuga ko bamaze gufata ibipimo bisaga ibihumbi 510, umujyi wa Kigali ukaba ari wo wagaragayemo abarwayi benshi batahuwe ahahurira abantu benshi nko ku masoko ndetse no ku kibuga cy'indege.

Kuri ubu ibikorwa byinshi by'ubukungu byongeye gufungurwa mu Rwanda, ndetse n'amashuri akaba agiye kongera gutangira muri uku kwezi hagati.

Abashinzwe ubuzima mu Rwanda bavuga ko umubare w'abandura bashya ugenda ugabanuka ndetse hakaba hamaze gufatwa icyemezo cyo gufunga ibigo byinshi byavuraga abanduye Covid-19 byari byarakwijwe hirya no hino mu gihugu.

Kuri ubu hasigaye ibigo biri ku bitaro by'urwego rw'intara, cyakora umujyi wa Kigali wo wagumanye ibigo bitanu bikurikirana kandi bikavura abanduye virusi ya Covid-19.

Ministeri y'ubuzima ivuga ko icyemezo cyo kugabanya ibi bigo cyatewe n'uko ubwandu bugenda bugabanuka.

Ivuga kandi ko buri wese wanduye atari ko aba akenewe kwitabwaho byihariye kwa muganga.

Abantu batarembye ariko bigaragara ko banduye, basabwe kujya baguma mu ngo zabo akaba ari ho bakurikiranirwa mu gihe bari munsi y'imyaka 65.

Aba bantu kandi bagomba kuba bagaragaza ubushobozi bw'uko bafite ahantu hisanzuye habemerera kwishyira mu kato badahura n'abandi bo mu muryango, kandi bagaragaza ubushobozi bwo kwiyitaho cyane cyane mu rwego rw'isuku n'ifunguro.

Kuri ubu ibikorwa byinshi bimaze kongera gukomorerwa. Amashuri ya kaminuza azongera gufungurwa muri uku kwezi kwa 10 akurikirwe n'ayisumbuye mu kwezi gutaha.

Imikino myinshi yemerewe kongera gusubukurwa.

Kugeza ubu ariko ahantu hagenewe imyidagaduro ndetse n'inzu z'ubunywero byo biracyafunze.