Rwanda: Thomas Kigabo umuhanga mu by’ubukungu muri Banki nkuru 'yishwe na Covid'

Thomas Kigabo Runezerwa

Ahavuye isanamu, Rwanda Central Bank

Insiguro y'isanamu,

Thomas Kigabo Runezerwa yari amaze imyaka irenga 10 ashinzwe ishami ry'ubukungu muri Banki nkuru y'u Rwanda

Dr Thomas Kigabo, ukuriye ishami rishinzwe ubukungu muri Banki nkuru y'u Rwanda yapfiriye mu bitaro i Nairobi muri Kenya, nk'uko bamwe mu bakozi b'iyi Bank babibwiye BBC uyu munsi.

Prof Kigabo yakoraga muri Banki nkuru y'u Rwanda kuva mu 2007, indwara yamuhitanye ntabwo iratangazwa.

Ikinyamakuru New Times cyo ku ruhande rwa leta, kivuga ko amakuru gikesha abo mu muryango we avuga ko yazize indwara ya Covid-19.

Igitangazamakuru RBA cya leta nacyo cyatangaje ko Bwana Kigabo 'yishwe na Covid-19 aho yariho avurirwa muri Kenya'.

Itangazo rya banki nkuru y'u Rwanda rivuga ko Kigabo yari umunyamurava kandi ukorana ubwitange.

Kigabo w'imyaka 57, niwe muntu ukomeye mu nzego za leta uvuzweho kuba yishwe n'iki cyorezo.

Umwe mu bakora muri iyi banki yabwiye BBC ko hari hashize igihe gitoya cyane agiye kwivuriza muri Kenya.

Bivugwa ko Thomas Kigabo Rusuhuzwa yagiraga uruhare rukomeye mu gushyira mu bikorwa politiki y'ifaranga ry'u Rwanda na gahunda za leta mu by'ubukungu.

Kigabo yari kandi n'umwarimu muri kaminuza zitandukanye akaba n'umuvugabutumwa.

Covid-19 mu Rwanda imaze kwica abantu 133 mu barenga 10,000 bayanduye nk'uko imibare ya minisiteri y'ubuzima ibigaragaza.