Uganda Election 2021: Museveni ari imbere mu majwi y'agateganyo

Yoweri Museveni arahatanira manda ya gatandatu

Ahavuye isanamu, Getty Images

Insiguro y'isanamu,

Yoweri Museveni arahatanira manda ya gatandatu

Perezida Yoweri Museveni wa Uganda ari imbere mu majwi amaze gutangazwa by'agateganyo na komisiyo y'amatora mu gitondo cyo kuri uyu wa gatanu.

Museveni amaze kugira amajwi 1,536,205 (65.02%) mu gihe undi ukomeye mu bahatanye nawe Robert Kyagulanyi uzwi nka Bobi Wine afite amajwi 647,146 (27.39%).

Ibi ni ibyavuye ku biro by'itora 8,310 mu biro by'itora byose hamwe 34,684 biri mu gihugu nk'uko iyo komisiyo ibivuga.

Abandi bakandida bose bari munsi ya 1% uretse Patrick Amuriat umaze kugira amajwi 3.6% nk'uko iyo komisiyo ibivuga.

Abantu barenga miliyoni 18 bari biyandikishije kuri liste y'itora muri Uganda.

Komisiyo y'amatora ejo kuwa kane yavuze ko guhanahana ibiva ku biro by'amatora biri bukorwe neza nubwo mu gihugu nta internet ihari.

Insiguro y'isanamu,

Ibikorwa byo kubara amatora birakomeje muri Uganda

Akoresheje Twitter, mu ijoro ryacyeye umukandida Bobi Wine yatangaje ko "nubwo hari ubujura bw'amajwi n'urugomo byaranze umunsi w'amatora, ishusho ari nziza."

Yinubiye ko telephone ye, kimwe n'iy'umugore we, idashobora guhamagara no guhamagarwa hagamije kumubuza kuvugana n'indorerezi ze z'amatora aho ziri.

Simon Byabakama ukuriye komisiyo y'amatora ejo kuwa kane yavuze ko bari gukoresha uburyo bwabo bwihariye bwo guhanahana amakuru ava ku biro by'amatora.

Mu kiganiro n'abanyamakuru yagize ati: "Ntabwo turi gukoresha interent. Turi gukoresha system yacu yihariye. Ntimugire ubwoba, ibyavuye mu matora bizatangazwa nubwo internet yafunzwe."

Mu ntangiriro z'iki cyumweru, abategetsi bategetse gufunga imbuga nkoranyambaga na apps zo guhanahana ubutumwa, ndetse na website zimwe na zimwe zifashishaga internet ya VPN zirafungwa.