Tennis: Novak Djokovic ari gusatira ibihangange Rafael Nadal na Roger Federer

  • Na Jonathan Jurejko
  • BBC Sport
Insiguro ya video,

Novak Djokovic yegukanye Australian Open ya cyenda atsinze Daniil Medvedev

Ku cyumweru ubwo Novak Djokovic yakinaga umukino wa nyuma wa Australian Open ntibyari iri rushanwa gusa ahubwo yinjiraga no mu isiganwa ryo kuba 'GOAT' muri Tennis y'abagabo.

Muri tennis, umubare w'amarushanwa ya Grand Slam umukinnyi yegukana nibwo buryo bworoshye - nubwo atari kuri bose - ku ushaka kuvuga uwitwa Greatest Of All Time (GOAT).

Grand slams ni amarushanwa ane akomeye kurusha ayandi aba buri mwaka; Australian Open mu kwa mbere, French Open (Roland Garros) mu kwa gatanu, Wimbledon mu kwa karindwi, na US Open mu kwa cyenda.

Umunyaserbia Djokovic ku cyumweru yegukanye irushanwa nk'iri rya 18, bituma ubu Rafael Nadal na Roger Federer, bombi banganya amarushanwa nkaya 20, bamurusha abiri gusa.

Gutsinda umurusiya Daniil Medvedev kuri iki cyumweru byatumye isiganwa ryo kuba GOAT rihinduka irya batatu.

Djokovic w'imyaka 33 arushwa umwaka umwe gusa na Nadal kandi bisa n'aho afite igihe kinini imbere ye kurusha Federer w'imyaka 39, we utabarashije kuza mu irushanwa ry'i Melbourne uyu mwaka kubera imvune.

Isiganwa ryo kuba urusha abandi w'ibihe byose muri tennis y'abagabo ubu ni isiganwa ry'abagabo batatu, ibitarabayeho mbere.

Muri Wimbledon ya 2009 Federer yatsindiye Grand Slam ya 15 aca kuri Pete Sampras, ibyo bamwe mbere babonaga nk'ibidashoboka.

Ku myaka 23 Nadal yari amaze gutsindira amarushanwa nk'aya akomeye atandatu, mu gihe ku myaka 22 muri Australian Open ya 2008 ari bwo Djokovic yatsindiye irushanwa nk'iri rya mbere.

Nyuma yo kwegukana irushanwa rikomeye buri mwaka hagati ya 2003 na 2010, Federer yabaye nk'ugera ku gasongero mu 2011, umwaka Djokovic yazamuyemo urwego nawe.

Mu 2012 Federer yatwaye indi Wimbledon ariko kuva ubwo uyu musuwisi ntiyongeye mu gihe cy'imyaka ine kubera 'imvune n'ubuhanga bwa ba mucyeba'.

Nadal na Djokovic bamuriye isataburenge, yongera kwigaragaza mu 2017 atwara irindi, arusha Nadal amarushanwa atatu.

Gusa mu 2019 Nadal na Djokovic bigabanyije ariya marushanwa ane bombi, bituma isiganwa risa n'iritangira guhinduka irya batatu.

Mu kibuga hagati yabo?

Ku mikinire yabo, bamwe bavuga ko kuba Nadal atsinda cyane muri Roland Garros ku bibuga by'ibitaka bimugaragaza nkaho aba bacyeba be bamurusha kuba abakinnyi beza ku bibuga byose.

Naho ku mikino yabahuje hagati yabo uko ari batatu, Djokovic niwe uhagaze neza igihe cyose yahuraga nabo.

Mu marushanwa ayo ariyo yose, Djokovic yatsinze Federer inshuro 11 we amutsinda 23, yatsinze kandi Nadal inshuro 29 kuri 23 za Nadal.

Gusa Nadal niwe watsinze imikino myinshi aba ba mukeba be muri Grand slams:

  • Nadal 16
  • Djokovic 13
  • Federer 6

Bahagaze bate mu kuramba imbere?

Uretse ku Grand Slams, uburebure bw'igihe bamara ku mwanya wa mbere ku isi ni ikindi kintu kirebwa.

Federer niwe wamaze ibyumweru byinshi mu mateka ari imbere ku rutonde ku isi - ariko mu kwezi gutaha Djokovic aramucaho.

Kuba Nadal yaratsinzwe muri kimwe cya kane muri Australian Open byahise biha Djokovic amahirwe yo guca kuri Federer.

Ku itariki 08 z'ukwezi gutaha Djokovic azaba amaze ibyumweru 311 ari imbere ku isi mu bagabo.

Azahita aca kuri Federer wamaze ibyumweru 310, Peter Sampras (287), Ivan Lendl (270), Jimmy Connors (268) na Nadal (209).

Djokovic yagize ati: "Iyo yari intego ikomeye. Kubigeraho ni byiza cyane kuri njye, ubu ngiye gushyira imbaraga cyane muri Slams".

Nubwo Grand Slams arizo zirebwaho cyane kuko ari amarushanwa akomeye, hari ayandi marushanwa nayo ashyirwa muri iki kiganiro cya GOAT.

Ushyizemo andi marushanwa bita ATPs, Federer niwe wegukanye menshi kurusha aba babiri. Ubundi, umunyamerika Jimmy Connors - wegukanye ayo marushanwa 109 - niwe gusa banganya.

Isiganwa ryo kwitwa GOAT muri tennis y'abagabo ubu biraboneka ko ririmbanyije uwa batatu.

Insiguro y'amajwi,

Sada Nahimana: "Naho hari abibaza ko ndi rurangiranwa muri tennis, ntaho ndashika"