DR Congo: Luca Attanasio uhagarariye Ubutaliyani yiciwe hafi y’i Goma

Luca Attanasio ambasaderi wa Italy muri DR Congo

Ambasaderi w'Ubutaliyani muri Repubulika ya Demokarasi ya Congo yiciwe mu gitero hafi y'umujyi wa Goma, nk'uko byemejwe na minisiteri y'ububanyi n'amahanga y'iki gihugu.

Luca Attanasio yapfiriye mu bitaro azize ibikomere nyuma y'uko imodoka yari arimo irashwe n'abantu bitwaje intwaro kuri uyu wa mbere.

Abategetsi ba DR Congo bashinje umutwe wa FDLR kuba ariwo wakoze icyo gitero cyaguyemo ambasaderi Attanasio. FDLR yo irabihakana.

Minisitiri wa Congo ushinzwe ububanyi n'amahanga, Marie Tumba, yabwiye abanyamakuru ko leta iri gukora iperereza ku iyicwa rya Luca Attanasio n'abandi bantu babiri biciwe hamwe na we.

Umukuru w'intara ya Kivu ya ruguru Carly Nzanzu yabwiye BBC ko abantu bitwaje intwaro bateye urukurikirane rw'imodoka zarimo abantu barindwi nk'isaha ebyiri n'igice za mu gitondo. Avuga ko babanje kwica umushoferi w'umunyekongo wakorera PAM (WFP), abandi bahita babatwara muri parc ya Virunga. Avuga kandi ko abarinda parc bashoboye kurokora bane muri bo ariko mbere yo guhunga, abateye bahita babanza kurasa ambasaderi n'umurinzi we, nyuma bahavuye nibwo byatangajwe ko bapfuye.

Imodoka yari arimo bivugwa ko ari iy'ishami ry'umuryango w'abibumbye ryita ku biribwa PAM.

Umupolisi w'umutaliyani wari kumwe na ambasaderi hamwe n'undi muntu wa gatatu utaramenyekana neza, nabo bapfuye nk'uko bivugwa.

Federico D'Incà minisitiri w'Ubutaliyani ushinzwe imikoranire n'inteko ishingamategeko yatangaje ko "leta y'Ubutaliyani iri gushyira imbaraga mu kumenya ukuri" kuri uru rupfu.

Itangazo rya minisiteri y'ububanyi n'amahanga y'Ubutaliyani rivuga ko "ari akababaro kenshi kumenya urupfu rwa ambasaderi w'Ubutaliyani i Goma".

Birakekwa ko iki gitero cyari kigamije gushimuta nk'uko bivugwa na bamwe mu bakozi bakorera ikigo Virunga National Park kiri hafi.

Imitwe myinshi yitwaje intwaro ikorera hafi y'aka gace k'ibirunga gahana imbibi n'u Rwanda na Uganda.

Muri aka gace hari ingabo ibihumbi z'Umuryango w'Abibumbye (MONUSCO) zifite ubutumwa bwo kuhagarura amahoro.