Australia: Inzu y'abari bamaze igihe gito bashakanye yatwawe n'imyuzure hafi y'i Sydney

The floating house

Ahavuye isanamu, Reuters

Insiguro y'isanamu,

Iyo nzu yatwawe n'imyuzure igenda urebye imeze nk'uko yari isanzwe

Inzu y'umugabo n'umugore bo muri leta ya New South Wales muri Australia yatwawe n'imyuzure yaje giturumbuka ku munsi ubundi wari kuba uwo gusezerana kwabo.

Abaturanyi bari bumiwe bafashe amashusho y'iyo nzu y'ibyumba bitatu byo kuraramo yubatse mu iforoma (modeli) ya kera, ubwo yarimbukaga ikagenda yibirandura mu mugezi wa Manning, wuzuye kubera imvura nyinshi.

Abandi bantu babarirwa mu bihumbi batuye mu bice by'ibibaya muri Sydney babwiwe ko bishobora kuba ngombwa ko bava mu ngo zabo.

Uyu mujyi urimo kwibasirwa n'imyuzure ya mbere ikaze ibayeho mu myaka ibarirwa muri za mirongo ishize, mu gihe imvura ikomeje kugwa.

Abategetsi baburiye ko hashobora kubaho "imyuzure ishyira ubuzima mu kaga ije by'ako kanya", mu gihe bititezwe ko amazi agabanuka mbere yuko ku wa kane hagera.

Ahavuye isanamu, Reuters

Insiguro y'isanamu,

Kuri iki cyumweru, umuturage w'i Sydney yarokowe akurwa mu myuzure ari kumwe n'imbwa ye

Inzu zirindwi z'ubutabazi bwihuse zafunguye imiryango hakurya y'iyo leta. Gladys Berejiklian, Minisitiri w'intebe wa leta ya New South Wales, yavuze ko mu gace ka Mid-North Coast ko muri iyo leta hari kuba "ikintu kibaho rimwe mu myaka 100".

Warragamba Dam, isoko y'ingenzi y'amazi akoreshwa muri Sydney, ikomeje kurengerwa, ibintu bibaye ku nshuro ya mbere mu myaka myinshi ishize.

Iyo nzu byayigendekeye gute?

Sarah Soars na Joshua Edge bari bamaze igihe bakodesha iyo nzu iri ahitwa Mondrook, mu majyaruguru ya Sydney, kandi byari biteganyijwe ko ku wa gatandatu basezeranira ku nkombe z'umugezi imbere y'iyo nzu.

Ahavuye isanamu, Reuters

Insiguro y'isanamu,

Ingo zarengewe n'imyuzure mu mujyi wa Penrith

Bari bamaranye imyaka icyenda. Ubu barimo kubana n'umuryango. Ntabwo bari bari mu nzu ubwo yatwarwaga n'iyi myuzure.

Amagambo ya Peter Bowie, umwe muri ba nyir'iyo nzu, yasubiwemo n'igitangazamakuru ABC cyo muri Australia avuga ati: "Urebye yagiye ireremba nkaho ari ubwato bw'inzu, inzu yose uko yakabaye, nta kivuyeho".

Yongeyeho ati: "Yagiye yihuta cyane. Yagiye hafi kilometero imwe ntakirayivaho, 100%. Iyi nzu yagize gutya irahaguruka irareremba imanuka ku mugezi".