Egypt: Ubunigo bwa Suez bwafunzwe n'ubwato rutura butwaye kontineri
Ahavuye isanamu, EPA
Ubu bwato bwafunze hafi ubugari bw'inzira yose y'ubunigo bwa Suez
Amato y'ubutabazi ari gusunika ngo asubize ubwato bunini cyane mu mazi nyuma y'uko bufunze ubunigo bwa Suez mu Misiri, imwe mu nzira y'ubucuruzi ikomeye ku isi.
Leta ya Misiri ivuga ko yafunguye inzira ya cyera y'ubu bunigo kugira ngo igabanye umubyigano w'amato, mu gihe hari ubwoba ko ikibazo gishobora gufata iminsi.
Ubu bwato bwitwa Ever Given, bufite 400m z'uburebure na 59m z'ubugari, bufite ubushobozi bwo kwikorera kontineri 20,000 z'uburebure bwa 6m buri imwe, nk'uko ibiro ntaramakuru Reuters bibivuga.
Hafi 12% by'ibicuruzwa byo ku isi buca mu bunigo bwa Suez, buhuza inyanja ya Mediterane n'inyanja itukura, bukaba inzira ya bugufi ihuza Aziya n'Uburayi.
Evergreen Marine ivuga ko ubu bwato "bikekwa ko bwakubiswe n'umuyaga ukomeye utunguranye, bigatuma buhungabana bugata inzira… ku bw'impanuka bukagonga inkombe bugahagama".
Ubu bwato bwanditse muri Panama, buri kwerekeza ku cyambu cya Rotterdam mu Buholandi buvuye mu Bushinwa, bwari bugiye kwinjira muri Mediterane buciye muri ubu bunigo.
Ibinyamakuru byaho bivuga ko nyuma y'ikibazo cya tekiniki, ahagana saa mbili z'ijoro (ku isaha yo mu Rwanda) ku wa kabiri ubu bwato bwahagamye bwitambitse bufungira inzira ayandi.
Ahavuye isanamu, Vessel Finder
Ishusho igaragaza umubyigano w'amato watewe no guhagama kw'ubu bwato
Ahavuye isanamu, Vessel Finder
Igishushanyo cy'uko ubu bwato bwitambitse mu bunigo bwa Suez, kiranerekana andi amato menshi y'ubutabazi yo gusunika iruhande rwa Ever Given
Ubu bwato bwubatswe mu 2018 ni ubwa kompanyi y'ubwikorezi ya Evergreen Marine, bwatumye amato ajya mu byerekezo byombi abura inzira yuzurirana muri ako gace.
Dr Sal Mercogliano, umunyamateka mu by'inyanja ukorera muri Amerika, yabwiye BBC ko ibintu nk'ibi bidasanzwe, kandi "bishobora kugira ingaruka nyinshi ku bucuruzi ku isi".
Ati: "Ubu ni bwo bwato bunini cyane mu mateka buhagamye mu bunigo bwa Suez".
Yongeraho ati: "Nibadashobora kubukuramo... mu buryo bugoye cyane, bagomba gutangira kubupakurura."
Ahavuye isanamu, PLANET LABS
Ishusho ya satellite irerekana aho Ever Given yaheze mu nzira y'amazi
Admiral Osama Rabie ukuriye ikigo Suez Canal Authority (SCA) yatangaje ko imirimo yihutiwe iri gukorwa ngo babusubize mu nzira, kandi bafunguye inzira ya cyera ngo bagabanye umubyigano w'amato.
Hafi amato 19,000 yaciye mu bunigo bwa Suez mu 2020, SCA ivuga ko ikigeranyo cy'amato 51.5 anyura muri ubu bunigo buri munsi.
Ubunigo bwa Suez bureshya na 193Km, kandi bunafite ku ruhande ibiyaga bitatu karemano.
Mu 2015, leta ya Misiri yashoje ibikorwa byo kwagura ubugari bw'inzira nkuru y'amazi, binaha amato indi nzira ireshya na 35Km iri iruhande rw'inzira nkuru.
Ahavuye isanamu, Reuters
Ku butaka naho bari kwigizayo umucanga bacukura ngo bagobotore ubu bwato
