Uganda yataye muri yombi abacyekwaho kwica intare muri pariki

Intare zishwe ni izo mu bwoko bufite ubushobozi bwo kurira ibiti

Ahavuye isanamu, Getty Images

Insiguro y'isanamu,

Intare zishwe ni izo mu bwoko bufite ubushobozi bwo kurira ibiti

Abategetsi muri Uganda bataye muri yombi abantu bane bacyekwaho kwica intare esheshatu muri imwe muri pariki zizwi cyane muri icyo gihugu.

Ku wa gatanu w'icyumweru gishize, izo ntare zasanzwe zapfuye ndetse zacagaguwemo ibice, imirambo yazo ikikijwe n'inkongoro (ubwoko bw'ibisiga) zapfuye muri Queen Elizabeth National Park.

Ku wa kabiri, ikigo cya Uganda cyita ku nyamaswa (UWA, mu mpine y'Icyongereza) cyatangaje ko abo bacyekwaho kuzica bafatiwe mu gikorwa gihuriwemo n'igisirikare, polisi n'abakuriye ibyo kwita ku nyamaswa.

Itangazo ry'ikigo UWA rigira riti:

"Uyu munsi [ejo ku wa kabiri] mu gitondo, abacyekwaho icyaha bajyanye itsinda ry'abashinzwe umutekano ahantu hasanzwe imitwe itatu y'intare ihishe mu giti n'umutwe wa kane wari washyinguwe hamwe n'amaguru 15 munsi y'icyo giti".

"Abacyekwaho icyaha bavuze ko bataye akaguru kamwe muri pariki".

Iki kigo cya Uganda cyita ku nyamaswa cyavuze ko cyanabonye icupa ririmo ikinyabutabire cy'uburozi ndetse n'ijerekani irimo amavuta y'intare, kikabifatana umwe mu bacyekwaho icyaha.

Ikigo UWA cyavuze ko igikorwa cyo guhiga abacyekwaho kwica izo ntare cyatangiye nyuma yuko kibonye "amakuru yo kwizerwa".

Ku wa mbere, cyari cyashyizeho igihembo cya miliyoni 10 z'amashilingi ya Uganda (arenga miliyoni 2.7 z'amafaranga y'u Rwanda) ku watanga amakuru nk'ayo.

Mu cyumweru gishize, iki kigo cyatangaje ko "kibabajwe" n'iyicwa ry'izo ntare - zizwiho umwihariko wo gushobora kurira ibiti.