Ethiopia: MSF ivuga ko 'yiboneye abasirikare ba leta bica abasivile' muri Tigray

An Ethiopian solider carrying a mattress - November 2020

Ahavuye isanamu, AFP

Umuryango w'abaganga batagira umupaka, Médecins Sans Frontières (MSF), uvuga ko ku wa kabiri wiboneye abasirikare ba Ethiopia bica barashe abaturage bane b'abasivile mu karere ka Tigray mu majyaruguru y'igihugu.

Mu itangazo yasohoye, MSF yavuze ko abakozi bayo bari bari mu rugendo babonye ibyo byabereye mu muhanda uhuza umurwa mukuru Mekelle wa Tigray n'umujyi wa Adigrat.

Itangazo rya MSF rigira riti: "Abasirikare bahise bahatira abagenzi kuva mu modoka za mini-bisi. Abagabo batandukanywa n'abagore, aba bemererwa kugenda. Nyuma yaho gato, abagabo bararashwe".

MSF yavuze ko abakozi bayo banabonye "igisa nk'ahari hari umutego wari watezwe uruhererekane rw'imodoka z'igisirikare cya Ethiopia, watezwe n'undi mutwe witwaje intwaro, [uwo mutego] wakomerekeyemo abasirikare n'abandi baricwa".

Itangazo rya MSF rigira riti: "Imodoka za gisirikare zari zikirimo gushya".

Abo bakozi ba MSF - bari bahagaritswe hamwe n'izo bisi ebyiri zitwara abagenzi - bemerewe kugenda, ariko bongera guhagarikwa n'abasirikare bakuye umushoferi wa MSF mu modoka, bamukubitisha ikirindi cy'imbunda.

Ariko iryo tsinda ry'abakozi ba MSF ryashoboye kongera gusubira i Mekelle. MSF ivuga ko bari bari mu modoka iriho ikirango kigaragaza neza ko ari iya MSF.

MSF yasabye ko abaturage b'abasivile barindwa muri iyi mirwano.

BBC ntibazwa ibivuye ku zindi mbuga.

Ku wa kabiri, Minisitiri w'intebe wa Ethiopia Abiy Ahmed yabwiye abadepite ko abasirikare bazahamwa no gukora ubwicanyi ndengakamere muri Tigray "bazabiryozwa".

Mu kwezi kwa cumi na kumwe mu 2020 ni bwo Bwana Abiy yategetse igabwa ry'ibitero bya gisirikare, nyuma yuko abarwanyi b'ishyaka Tigray People's Liberation Front (TPLF) ryari ku butegetsi muri ako karere bateye ibigo by'ingabo za leta.

Amakuru avuga ko imirwano imaze guhitana ababarirwa mu bihumbi naho abandi babarirwa mu bihumbi za magana bataye ingo zabo.