Myanmar: US 'ibabajwe bikomeye' n'abantu benshi cyane bishwe kuva igisirikare cyahirika ubutegetsi

A man with a National League for Democracy flag in Yangon

Ahavuye isanamu, Reuters

Insiguro y'isanamu,

Imyigaragambyo yabereye mu mijyi 40, harimo n'aha mu mujyi wa Yangon

Antony Blinken, ukuriye ububanyi n'amahanga bw'Amerika, yavuze ko iki gihugu "kibabajwe bikomeye" n'impfu zo ku wa gatandatu muri Myanmar.

Abantu babarirwa muri za mirongo bishwe n'abashinzwe umutekano mu myigaragambyo, kuri uwo munsi wabaye uwa mbere wishwemo abantu benshi cyane kuva igisirikare cyahirika ubutegetsi bwari busanzweho.

Abakuru b'ingabo bo mu bihugu 12, birimo Ubwongereza, kuri iki cyumweru basohoye itangazo bahuriyeho - ibidakunze kubaho - bamagana ibikorwa by'urugomo by'igisirikare cya Myanmar.

Amerika, Ubuyapani na Australia na byo ni bimwe mu bihugu byashyize umukono kuri iryo tangazo rigira riti:

"Igisirikare cy'umwuga gikurikiza imyitwarire yemewe ku rwego mpuzamahanga kandi gifite inshingano yo kurinda - aho kugirira nabi - abaturage gikorera".

Ubwo bwicanyi - amakuru avuga ko bwahitanye abantu barenga 100 - bugaragaza "ko agatsiko kazatanga igitambo cy'ubuzima bw'abaturage ku nyungu za bacye", nkuko Bwana Blinken yabivuze.

Ati: "Abantu b'abanyamurava bo muri Burma [irindi zina rya Myanmar] banze iyimikwa ry'iterabwoba rya gisirikare".

Mbere, ambasade y'Amerika muri Myanmar yari yavuze ko abashinzwe umutekano "barimo kwica abasivile badafite intwaro".

Ahavuye isanamu, Reuters

Insiguro y'isanamu,

Umuryango uri mu kababaro mu mujyi wa Yangon

Ni mu gihe intumwa zihagarariye ibihugu by'umuryango w'Ubumwe bw'Uburayi (EU/UE) muri Myanmar zavuze ko uwo munsi wo ku wa gatandatu - wizihijweho umunsi w'ingabo - "uzahora wibukwa nk'umunsi w'iterabwoba n'ikimwaro".

Umunyamabanga mukuru w'umuryango w'abibumbye (ONU/UN) Antonio Guterres yavuze ko "ababajwe bikomeye" n'ubwo bwicanyi, mu gihe Dominic Raab, ushinzwe ububanyi n'amahanga bw'Ubwongereza, yabyise "ibindi bintu bibi cyane bibayeho".

Insiguro ya video,

Abaganga n'abakorerabushake bashimirwa ubwo bihutishaga inkomere bayijyana ku bitaro

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Uku kwirara mu basivile kurimo no kubica - harimo n'abana - kwabaye ubwo abigaragambya barengaga ku byo igisirikare cyari cyababuriye bakajya mu mihanda.

Ishyirahamwe rifasha imfungwa za politike (AAPP) rigenzura ibihabera ryemeje ko abantu batari munsi ya 91 bishwe, mu gihe ibitangazamakuru byo muri Myanmar byo byatanze umubare urenzeho.

Ari mu mujyi wa Myingyan rwagati mu gihugu, Thu Ya Zaw yabwiye ibiro ntaramakuru Reuters ati:

"Barimo kutwica nk'inyoni cyangwa imishwi y'inkoko, no mu ngo zacu".

"Tuzakomeza kwigaragambya nihahandi".

Uru rugomo rundi rwatumye umubare w'abamaze kwicwa kugeza ubu mu bikorwa byo kuburizamo imyigaragambyo y'abamagana ihirikwa ry'ubutegetsi ryo ku itariki ya mbere y'ukwezi kwa kabiri urenga abantu 400.

Igisirikare cyafashe ubutegetsi muri iki gihugu cyo muri Aziya yo mu majyepfo ashyira uburasirazuba, nyuma y'amatora ishyaka National League for Democracy (NLD) rya Aung San Suu Kyi ryatsinze ku bwiganze bw'amajwi.

Ahavuye isanamu, Reuters

Insiguro y'isanamu,

Uburyo bwo gufunga umuhanda mu mujyi wa Yangon

Ahavuye isanamu, EPA

Insiguro y'isanamu,

Mu ijambo ryanyuze kuri televiziyo y'igihugu mbere y'imyigaragambyo, Jenerali Min Aung Hlaing yaburiye kwirinda "ibikorwa by'urugomo bigira ingaruka ku ituze n'umutekano"

Ahavuye isanamu, EPA

Insiguro y'isanamu,

Abasirikare ku wa gatandatu bakoze akarasisi ko kwizihiza umunsi w'ingabo