Imbwa ya Biden yitwa Major yongeye kurumana muri White House

Major itemberezwa n'umukozi mu busitani bwa White House kuwa 29 03 2021

Ahavuye isanamu, AFP

Insiguro y'isanamu,

Iyi ni inshuro ya kabiri iyi mbwa yitwa Major irumanye muri White House

Imbwa y'umuryango wa Biden yongeye kurumana nanone, nyuma y'iminsi gusa ivuye mu mahugurwa i Delaware kubera ko mu ntangiriro z'uku kwezi nabwo yari yarumanye muri White House.

Umuvugizi w'umugore wa perezida wa Amerika Jill Biden yavuze ko uwo iyo nyarubwana yarumye yitaweho n'abaganga ba White House mbere yo gusubira mu kazi ke.

Major ni yo mbwa ntoya muri ebyiri z'ubwoko bwa German Shepherds ikaba n'imbwa ya mbere yakiriwe ivanywe mu zikeneye gufashwa.

Michael LaRosa, umuvugizi wa Madamu Biden, yavuze ko ibyo byabaye ku wa mbere, ko Major "ikiri kumenyera ibiyikikije bishya kandi yarumye umuntu ubwo yariho igendagenda".

CNN ivuga ko umukozi wa National Park Service yarumwe n'iyi ntozo bikaba ngombwa ko ahagarika akazi kugira ngo avurwe. National Park Service ntacyo iratangaza ku byabaye.

Imbwa za Major na Champ, tariki umunani z'uku kwezi kwa gatatu, zasubijwe ku rugo rwa ba Biden i Wilmington nyuma y'uko Major yari yarumanye muri White House kandi inafite amahane.

Ahavuye isanamu, Reuters

Insiguro y'isanamu,

Perezida Biden yakiriye mu muryango we Major mu 2018

Abantu batifuje gutangazwa babwiye CNN icyo gihe ko Major yari imaze iminsi isimbukira, imokera cyangwa isagarira abakozi n'abashinzwe umutekano muri White House.

Perezida Biden yavuze ko Major yari itaramenyera abantu bashya iruhande rwayo.

Yabwiye ikiganiro Good Morning America cya ABC ati: "Ukase mu nguni uhasanze abantu babiri utazi na busa bagahita banyeganyega, nayo ihita ishaka kwitabara".

Yongeyeho ati: "85% by'abantu [muri White House] barayikunda. Icyo ikora ni ukubarigata ikazunguza umurizo. Ariko...Nabonye ko hari abantu, mu buryo bwumvikana, batinya imbwa".

Mu 2018 umuryango wa Biden wakiriye iyi mbwa, ubu ifite imyaka itatu, ikiri ikibwana bayivanye mu nzu yakira imbwa zikeneye gufashwa.

Iyitwa Champ, y'imyaka 13, yo ikiri ntoya hari igihe yari yaramaze muri White House igihe Biden yari visi perezida, mbere yo kuhagaruka nanone mu kwezi kwa mbere uyu mwaka.