Covid-19: Kenya nayo yashyizwe 'ku rutonde rutukura' rw’Ubwongereza

Uhuru Kenyatta na Boris Johnson

Ahavuye isanamu, UK Gov

Ubwongereza bwashyize Kenya ku 'rutonde rutukura' kubera impungenge z'ikwirakwira ry'ubwoko bushya bwa coronavirus.

Guhera tariki 09 z'ukwezi kwa kane, abagenzi bavuye cyangwa baciye muri Kenya, Philippines, Pakistan, na Bangladesh ntibazamererwa kwinjira mu Bwongereza.

Ibi bihugu byiyongereye ku bindi bigera kuri 30 byashyizwe kuri urwo rutonde n'Ubwongereza kubera izo mpungenge.

Abafite 'passports' z'Ubwongereza na Irland n'abafite uburenganzira bwo kuhatura bo bemerewe kujyayo, ariko bakabanza kujya mu kato mu minsi 10 muri hoteli yemejwe na leta, ku kiguzi cyabo.

Ubwongereza ariko buvuga ko butabujije indege kuva muri ibyo bihugu ziganayo, ariko bugira inama abagenzi gusuzuma gahunda zabo z'ingendo mbere yo kujyayo.

Kuva mu kwezi kwa mbere, u Burundi, DR Congo, Ethiopia, Somalia u Rwanda na Tanzania nabyo biri kuri urwo rutonde rw'ibihugu abagenzi bahavuye batemerewe kujya mu Bwongereza.

Mu kwezi kwa kabiri, minisiteri y'ububanyi n'amahanga y'u Burundi yatangaje ko iki gihugu "gishobora gukorera Ubwongereza nk'ibyo bwakoze niba butisubiyeho kuri icyo cyemezo".

Hari abasaba ko kuri urwo rutonde - rwiganjeho ibihugu bya Africa na Amerika y'Epfo - rushyirwaho n'ibihugu by'Iburayi aho abandura Covid-19 bari kwiyongera, ariko leta y'Ubwongereza ivuga ko ubu nta mugambi ifite wo kubikora, nk'uko bivugwa n'ibiro ntaramakuru Reuters.