Rwanda: Abakinnyi ba Arsenal na PSG batanze ubutumwa bwo kwibuka

Kylian Mbappe

Ahavuye isanamu, AFP

Abakinnyi, umutoza cyangwa abayobozi mu makipe ya Paris Saint-Germain na Arsenal batanze ubutumwa buvuga ko bifatanyije n'u Rwanda n'Abanyarwanda muri iki gihe cyo kwibuka jenoside cyatangiye uyu munsi.

Aya makipe yombi afitanye amasezerano yishyuwemo miliyoni z'ama-Euro yo kwamamaza ubukerarugendo bw'u Rwanda.

Mu butumwa buteguwe bw'amashusho abakinnyi ba PSG nka Pablo Sarabia, Abdou Diallo, Juan Bernat, Rafinha Alcantara na Kylian Mbappé bavuze ubutumwa burimo amagambo yo gukomeza abarokotse.

BBC ntibazwa ibivuye ku zindi mbuga.

Bavuga ko bashima 'gukomera n'impinduka nziza zabayeho mu Rwanda'.

Ubutumwa bwa Arsenal bwatangajwe n'abakinnyi barimo Pierre-Emerick Aubameyang, Granit Xhaka, Alexandre Lacazette, cyangwa umutoza wabo Mikel Arteta n'abandi nka Tony Adams wakinnye muri iyi kipe.

BBC ntibazwa ibivuye ku zindi mbuga.

Mu butumwa bwabo, bavuze ko "gufunguka mu kuvuga ibyabaye byubaka ejo heza hazaza hagizwe n'urukundo no kubahana".

Undi watanze ubutumwa bugendanye n'igihe cyo kwibuka, ni Antonio Guterres, umunyamabanga mukuru wa ONU/UN, wavuze ko kubera ibyabaye mu Rwanda mu 1994 "tuzi ingaruka mbi zibaho iyo urwango rushyizwe imbere".

Yagize ati: "Kurwanya ko amateka yisubiramo birasaba kurwanya ibikorwa by'urwango byabaye ikibazo ku bihugu byinshi.

"Mu kugera kuri ibyo tugomba kubahiriza uburenganzira bw'ikiremwamuntu no gukomeza gushishikariza politiki zubaha nyabyo abagize sosiyete bose."