Covid-19: Kuvura kw'amaraso ni 'ingaruka y'imbonekarimwe iterwa na AstraZeneca'

AstraZeneca

Ahavuye isanamu, Reuters

Ikigo cy'umuryango w'ubumwe bw'Uburayi kigenzura ubuziranenge bw'imiti (EMA) kivuga ko kuvura kw'amaraso kudakunze kubaho gukwiye gufatwa nk'ingaruka y'imbonekarimwe y'urukingo rwa AstraZeneca rwa Covid-19.

Nyuma y'ubushakashatsi bwakorewe ku bantu 86 i Burayi, ikigo EMA cyafashe umwanzuro ko ibyiza by'urwo rukingo biruta ibyago ruteza.

Raporo y'ikigo EMA ijyanye n'amakuru ku bantu miliyoni 25 b'i Burayi bahawe urwo rukingo.

Ikigo EMA ntabwo cyashoboye kugaragaza nyirizina ibitera ibyo byago, nk'ikigero cy'imyaka cyangwa igitsina, ariko kwinshi mu kuvura kw'amaraso kwabonetse mu bagore bafite munsi y'imyaka 60 y'amavuko.

Benshi mu bagize icyo kibazo muri abo 86 ni abagore bafite munsi y'imyaka 60, 18 barapfuye. Bakoreweho ubushakashatsi kugeza ku itariki ya 22 y'ukwezi kwa gatatu.

Mu yandi makuru atandukanye, ikigo cy'ubujyanama ku nkingo cy'Ubwongereza cyavuze ko abafite munsi y'imyaka 30 bo muri iki gihugu bagiye guhabwa urundi rukingo rwo gusimbura AstraZeneca kubera ikibazo cyo kuvura kw'amaraso.

Kugeza mu mpera y'ukwezi kwa gatatu, mu Bwongereza abantu 79 bagize icyo kibazo kidakunze kubaho cyo kuvura kw'amaraso nyuma yuko bakingiwe, 19 muri bo barapfuye.

N'akanama k'ishami ry'umuryango w'abibumbye ryita ku buzima (OMS/WHO) kajya inama ku nkingo, ku wa gatatu kavuze ko nubwo isano ry'urwo rukingo no kuvura kw'amaraso "isa nk'ishoboka", "ntabwo yemejwe".

Ako kanama ka OMS kanavuze ko ibyo bibazo byabonetse "gacye cyane" mu bantu miliyoni 200 ku isi bahawe urukingo rwa AstraZeneca.

Ku isi abantu barenga miliyoni 133 bamaze gutangazwa ko banduye Covid-19, ndetse n'abo yishe barenga miliyoni 2,8, nkuko imibare yakusanyijwe na Kaminuza ya Johns Hopkins yo muri Amerika ibigaragaza.

Kenya ihakana ko hari uwapfuye bivuye ku rukingo

Nta muntu wapfuye muri Kenya mu bantu barenga 300,000 bamaze guhabwa doze ya mbere y'urukingo rwa AstraZeneca, nkuko ikigo kigenzura ubuziranenge bw'imiti cy'iki gihugu cyabitangaje.

Umukuru wungirije w'icyo kigo Dr Peter Ikamati avuga ko umukozi wo kwa muganga wapfuye, wari watewe urwo rukingo, bicyekwa ko yagize ikibazo cyo kuvamo kw'inda agapfa.

Mu itangazo, Fred Siyoi ukuriye icyo kigo cya Kenya kigenzura ubuziranenge bw'imiti, yagize ati:

"Iki kigo kirifuza gutanga umucyo ko habayeho gutangaza amakuru nabi ku ngaruka yakurikiye ikingirwa hatangazwa ko byateye urupfu".

Yongeyeho ati: "Abatangajwe ko bagizweho ingaruka nyuma yo gukingirwa barimo gukorwaho iperereza kandi nta n'umwe muri bo byaviriyemo urupfu".

Uwapfuye yari umuforomo wakoraga muri bimwe mu bitaro cyo mu karere ka Uasin Gishu mu burengerazuba bwa Kenya.

OMS itanga inama ko abagore bari hafi kubyara bakwiye guhabwa urukingo ari uko gusa ibyiza byo kuruhabwa biruta ibyago rushobora kubateza.

Aho ni nko mu gihe bakora kwa muganga bakaba bafite ibyago byinshi byo kwandura kubera guhora hafi y'abarwayi, cyangwa bakaba basanzwe bafite ubundi burwayi bubashyira mu cyiciro cy'abashegeshwa na Covid-19.

Minisiteri y'ubuzima ya Kenya yanavuze ko kugeza ubu itarabona abagira ikibazo kidakunze kubaho cyo kuvura kw'amaraso kiri gutangazwa mu bihugu bimwe by'i Burayi.

Imibare y'ikigo cya Kenya kigenzura ubuziranenge bw'imiti igaragaza ko abantu 279 bagizweho ingaruka n'urukingo rwa AstraZeneca. Barindwi muri bo barimo kugaragaza ibimenyetso bikaze.