Prince Philip yapfuye ku myaka 99, nkuko bivugwa na Buckingham Palace

Prince Philip, Duke of Edinburgh

Igikomangoma Philip, umugabo w'umwamikazi Elizabeth II, yatabarutse ku myaka 99, nk'uko bitangazwa na Buckingham Palace.

Philip yashakanye na Elizabeth mu 1947, imyaka itanu mbere y'uko aba umwamikazi.

Itangazo ry'ingoro y'umwamikazi (Buckingham Palace) rivuga ko: "Ni n'akababaro kenshi ko Umwamikazi yatangaje urupfu rw'umugabo we, Nyiricyubahiro Igikomangoma Philip, Duke wa Edinburgh.

"Nyiricyubahiro yatabarutse mu mahoro muri iki gitondo i Windsor Castle."

Insiguro ya video,

Igikomangoma Philip: Umusirikare, umugabo, papa

Minisitiri w'intebe w'Ubwongereza Boris Johnson yavuze ko Igikomangoma Philip "yabaye urugero mu buzima bw'ababyiruka benshi".

Ingoro y'Umwamikazi yatangaje ko andi matangazo atangwa "mu gihe gikwiye".

Itangazo ribika urupfu rwe rivuga ko "Umuryango w'Ibwami wifatanyije n'abantu ku isi mu kubura umwe mu bawo".

Ahavuye isanamu, Reuters

Insiguro y'isanamu,

Abakozi b'ibwami bazanye itangazo ku irembo nyuma y'urupfu rw'igikomangoma

Ahavuye isanamu, Reuters

Insiguro y'isanamu,

Itangazo ryamanitswe ku irembo ry'ibwami

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Boris Johnson avugira ku biro bye Downing Street, yagize ati: "Yafashije gukomeza Umuryango w'Ibwami n'ufite inkoni y'ubwami kugira ngo bikomeze kuba urwego rw'ingenzi mu buzima n'ibyishimo by'igihugu cyacu".

Johnson yavuze ko yakiranye "umubabaro ukomeye" inkuru y'urupfu rw'Igikomangoma Philip.

Ati: "Igikomangoma Philip urungano runyuranye rwaramukunze cyane, hano mu Bwongereza, muri Commonwealth, ndetse n'ahandi ku isi".

Igikomangoma Philip n'Umwamikazi Elizabeth II babyaranye abana bane, bafite abuzukuru umunani n'abuzukuruza 10.

Umuhungu wabo wa mbere, igikomangoma cya Wales, Igikomangoma Charles, yavutse mu 1948, akurikirwa na mushiki we Igikomangoma Anne wavutse mu 1950, na Duke wa York Igikomangoma Andrew wavutse mu 1960 na Earl wa Wessex, Igikomangoma Edward, wavutse mu 1964.

Igikomangoma Philip yavukiye mu Bugiriki tariki 10 z'ukwezi kwa gatandatu 1921.

Se, yari Igikomangoma Andrew w'Ubugiriki na Denmark, yari umuhungu muto w'Umwami George I wa Hellenes.

Nyina, Igikomangoma Alice, yari umukobwa wa Louis Mountbatten n'umwuzukuruza w'Umwamikazi Victoria.

Ahavuye isanamu, TIM GRAHAM/PA

Insiguro y'isanamu,

Igikomangoma Philip yabaye iruhande rw'Umwamikazi imyaka irenga 60, aba uwashakanye n'ufite inkoni y'Ubwami umaze igihe kinini kuri uwo mwanya mu mateka y'Ubwongereza