Israel – Palestine: Imfashanyo yageze muri Gaza mu gihe agahenge gakomeje

Insiguro ya video,

Abana babiri bo mu mujyi wa Gaza baravuga ko bihe banyuzemo mu mirwano hagati ya Israel na Gaza

Uruhererekane rwa mbere rw'imodoka zitwaye imfashanyo rwageze muri Gaza, nyuma y'amasaha agahenge gakurikijwe hagati ya Israel n'intagondwa z'Abanye-Palestine.

Abanye-Palestine babarirwa mu bihumbi basubiye imuhira, barumirwa babonye ibyangiritse, mu gihe abategetsi bavuga ko kongera kwiyubaka bishobora gufata igihe kibarirwa mu myaka.

Ishami ry'umuryango w'abibumbye ryita ku buzima (OMS/WHO) ryasabye ko hashyirwaho imihora (imiyoboro) yo kunyuzamo abantu bakomeretse bakajyanwa kuvurwa.

Abantu barenga 250 biciwe muri iyo mirwano yamaze iminsi 11, benshi muri bo ni abiciwe muri Gaza. Yaba Israel, yaba umutwe wa Hamas ugenzura Gaza, buri ruhande rwavuze ko ari rwo rwatsinze muri iyo mirwano.

Mu majyepfo ya Israel, abahatuye bishimiye agahenge, ariko benshi bagaragaje impungenge zuko indi mirwano muri ako karere ubu ishobora kubaho igihe icyo ari cyo cyose.

Ahavuye isanamu, Getty Images

Insiguro y'isanamu,

Ku wa gatanu amakamyo atwaye imfashanyo yinjiye muri Gaza anyuze ku mupaka wa Kerem Shalom

Amakamyo y'imiryango itandukanye itanga imfashanyo, irimo n'ishamikiye ku muryango w'abibumbye (ONU/UN), yatangiye kujyana muri Gaza imfashanyo icyenewe cyane y'imiti, ibiribwa n'ibitoro, nyuma yuko Israel yongeye gufungura umupaka wa Kerem Shalom.

Abantu barenga 100.000 muri Gaza byabaye ngombwa ko bata ingo zabo. Abandi bagera hafi ku 800.000 ntibashoboye kubona amazi meza, nkuko ishami rya ONU ryita ku bana (UNICEF) ribivuga.

Abategetsi bo muri Palestine bavuga ko hazacyenerwa miliyoni z'amadolari zibarirwa muri za mirongo mu kongera kubaka ako karere gasanzwe gacyennye kandi kanibasiwe n'icyorezo cya Covid-19.

Margaret Harris, umuvugizi wa OMS, yasabye ko hahita hashyirwaho uburyo bwo gutuma imiti n'abaganga bahagera.

Madamu Harris yavuze ko hari ibyago ko amavuriro yo muri Gaza arengerwa ubushobozi kubera abantu babarirwa mu bihumbi bakomeretse.

Gaza imaze imyaka myinshi yarashyizweho amananiza na Israel na Misiri ku bijyanye n'urujya n'uruza rw'abantu n'ibicuruzwa, ibi bihugu byombi bivuga ko bifite impungenge ko ibyo byatuma intwaro zigera kuri Hamas.

Ahavuye isanamu, EPA

Insiguro y'isanamu,

Nyuma y'agahenge, Abanye-Palestine benshi basanze ingo zabo zarasenyutse muri Gaza

Ahavuye isanamu, EPA

Insiguro y'isanamu,

Abakobwa b'Abanye-Palestine barareba inzu y'iwabo yasenyutse. Abategetsi bavuga ko hazacyenerwa za miliyoni z'amadolari zo gusana ibyangiritse.

Ahavuye isanamu, Reuters

Insiguro y'isanamu,

Polisi ya Israel yakozanyijeho n'Abanye-Palestine bari bari mu nyubako iri ku musozi, irimo umusigiti wa al-Aqsa

Ahavuye isanamu, EPA

Insiguro y'isanamu,

Ku wa gatanu, Abanya-Israel basohotse mu bwihisho bwo kwirinda ibisasu mu mujyi wa Ashkelon wo mu majyepfo y'igihugu