IZARANZE 2021: Mozambique: Mu mirwano ingabo z'u Rwanda 'zishe inyeshyamba' hafi ya Palma

Ingabo z'u Rwanda n'abapolisi zigiye mu ntara ya Cabo Delgado muri Mozambique ku wa gatanu tariki 09/07/2021

Ahavuye isanamu, RDF

Insiguro y'isanamu,

Ingabo z'u Rwanda n'abapolisi zigiye mu ntara ya Cabo Delgado muri Mozambique mu ntangiriro z'uku kwezi

BBC Gahuzamiryango irabagezaho zimwe mu nkuru zaranze uyu mwaka urimo kurangira wa 2021.

Abashinzwe umutekano muri Mozambique bavuga ko ingabo z'u Rwanda zoherejwe gufasha kurwanya abarwanyi bazahaje intara ya Cabo Delgado zishe abarwanyi babarirwa muri za mirongo muri bo.

Abasirikare n'abapolisi 1,000 b'u Rwanda boherejwe muri iyo ntara iri mu majyaruguru ya Mozambique aho abantu bagera ku 800,000 bavuye mu byabo abagera ku 3,000 bakicwa kuva mu 2017, benshi muri bo baciwe imitwe n'izo nyeshyamba.

Ingabo z'u Rwanda zageze muri iki gihugu tariki ya 9 y'uku kwezi kwa karindwi bisabwe na Mozambique, hanashingiwe "ku masezerano menshi" ibihugu byombi bifitanye, nk'uko leta y'u Rwanda yabitangaje.

Amakuru avuga ko abasirikare b'u Rwanda ubwo barimo bagenzura ishyamba riri hafi y'umujyi wa Palma muri iki cyumweru, basakiranye n'abo barwanyi bakarwana.

Abashinzwe umutekano bavuga ko ingabo z'u Rwanda zabakurikiranye, zikica abagera kuri 30. Ntihavugwa niba ku ruhande rw'ingabo z'u Rwanda hari abo rwatakaje cyangwa inkomere.

Mozambique itegereje ko umuryango w'ubukungu w'ibihugu bya Africa yo mu majyepfo, SADC, na wo uyoherereza ingabo zo kuyifasha guhashya izi nyeshyamba zimaze imyaka ine zimonogoza.

Abasirikare ba Portugal bo bahamaze igihe batoza ingabo za Mozambique, ariko biboneka ko zananiwe kwirangiriza ubwazo ikibazo cy'izi nyeshyamba zitwa al-Shabab.

Mbere, Mozambique yabanje kutemera kuba yafashwa n'ingabo z'amahanga, ihitamo gukoresha abacanshuro bigenga.

Ariko aba barwanyi bateye umujyi wa Palma n'umwigimbakirwa wayo wa Afungi - ahakorera umushinga Liquefied Natural Gas (LNG) wa miliyari $20 wa kompanyi Total yo mu Bufaransa abawukoreraga barahunga, bituma Mozambique ihindura umuvuno.

Mu ngabo 1,000 z'u Rwanda zoherejwe, izigera kuri 300 zoherejwe gucunga umutekano mu gace ka Afungi, nk'uko byatangajwe n'uruhande rw'u Rwanda ubwo izi ngabo zagendaga.

Insiguro y'isanamu,

Abashinzwe umutekano muri Mozambique bavuga ko ingabo z'u Rwanda muri iki cyumweru zarwanye n'inyeshyamba hafi ya Pemba zikica abagera kuri 30 muri izo nyeshyamba