Myanmar: Jenerali Min Aung Hlaing yigize Minisitiri w'intebe, yongera ibihe bidasanzwe

Jenerali Min Aung Hlaing

Ahavuye isanamu, Reuters

Insiguro y'isanamu,

Mu ijambo rye, Jenerali Min Aung Hlaing yashyigikiye guhirika ubutegetsi kwe ndetse anenga bikomeye abatavuga rumwe na we

Jenerali wafashe ubutegetsi mu kwezi kwa kabiri ahiritse ubwari buriho muri Myanmar, yigize Minisitiri w'intebe anavuga ko ubutegetsi bwo mu bihe bidasanzwe ubu bushobora kugeza mu kwezi kwa munani mu 2023.

Mu ijambo ryamaze isaha imwe, Jenerali Min Aung Hlaing yasezeranyije gukoresha "amatora anyuze mu bwisanzure no mucyo ahuriwemo n'amashyaka menshi", ariko yanise ishyaka yahiritse ku butegetsi "abaterabwoba".

Abantu babarirwa mu magana bapfiriye mu myigaragambyo ikomeje kuba mu gihugu yo kwamagana ihirikwa ry'ubutegetsi ryakozwe n'igisirikare.

Abigaragambya benshi bakoraga mu rwego rw'ubuvuzi, ubu rwasenyutse mu gihe hari ubwiyongere bwinshi bw'ubwandu bwa Covid-19.

Kugeza ubu Myanmar imaze gutangaza abanduye Covid bagera ku 300,000 n'abishwe na yo bagera ku 9,300, nubwo kuba hari ibikoresho bicye byo gupima bica amarenga ko iyo mibare ari ukugereranya ko ku kigero cyo hasi.

Mu ijambo rya Jenerali ryanyuze kuri televiziyo, yashinje abamagana kuba yarahiritse ubutegetsi, avuga ko barimo gukwirakwiza Covid-19 ku bushake.

Yavuze ku "makuru y'ibinyoma n'amakuru ayobya ku mbuga nkoranyambaga" ku ngamba za leta ye zijyanye na Covid-19, avuga ko ari "igikoresho cy'iterabwoba rishingiye ku dukoko twanduza".

Umunyamakuru wa BBC Jonathan Head uri i Bangkok mu murwa mukuru wa Thailand, avuga ko ibi bikubiye mu ijambo ridasanzwe, yanavuzemo ko hacyenewe guhinga ipamba kurushaho n'ibitunguru, anamagana abagerageza gusenya leta n'imigenzo ya Myanmar.

'Nsezeranyije amatora ahuriwemo n'amashyaka menshi'

Jenerali Min yavuze ko Covid izahagarikwa binyuze mu nkingo nyinshi kurushaho, kongera iminsi y'ikiruhuko ndetse binyuze no mu cyo yise ubufatanye buboneye bw'abaturage.

Ariko uwo munyamakuru wacu avuga ko abaganga babarirwa muri za mirongo batawe muri yombi naho abandi benshi bakaba bihishe kuva ubutegetsi bwahirikwa.

Ni mu gihe abashaka kuvurwa bavuga ko igisirikare kibasubiza inyuma kibakura ku bitaro, kikanagabanya abarwayi bahabwa umwuka wo kubafasha guhumeka wa oxygen, bituma benshi bapfira mu ngo zabo.

Nyuma yuko igisirikare gifashe ubutegetsi mu kwezi kwa kabiri, hari hatangajwe igihe cy'umwaka umwe cy'ubutegetsi bwo mu bihe bidasanzwe.

Ahavuye isanamu, Reuters

Insiguro y'isanamu,

Abantu babarirwa mu magana bapfiriye mu myigaragambyo ikomeje kuba mu gihugu yo kwamagana ihirikwa ry'ubutegetsi

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Ariko gusuzugura ubutegetsi byo ku rwego rw'igihugu birakomeje, abakozi babarirwa mu bihumbi za mirongo bakaba barirukanwe cyangwa bari mu myigaragambyo.

Jenerali Min Aung Hlaing yashimangiye ko igihugu gifite ituze, yongeraho ati: "Nsezeranyije gukoresha amatora ahuriwemo n'amashyaka menshi nta na rimwe rivuyemo".

Ayo mashyaka ntibisobanutse ayo ari yo, mu gihe Jenerali Min yavuze ko ishyaka yahiritse ku butegetsi rya National League for Democracy (NLD) n'abayoboke baryo ari "abahezanguni bahisemo igikorwa cy'iterabwoba aho gukora cyangwa gucyemura ikibazo bisunze amategeko".

Umukuru wa NLD Aung San Suu Kyi arafunze kuva yahirikwa ku butegetsi, akaba aregwa ibyaha bitandukanye birimo no gutunga ibikoresho bitemewe by'itumanaho.

Aung Kyaw Moe, impirimbanyi iharanira uburenganzira bwa muntu muri Myanmar, yabwiye BBC ko ibyo Jenerali Min yasezeranyije ari "ikinyoma kandi ntibizaba... abaturage ba Myanmar ntibakwizera ibintu nk'ibyo yasezeranyije".