Afghanistan: Zabihullah Mujahid, umuvugizi w'aba Taliban w'amayobera, byarangiye yigaragaje

  • Na George Wright
  • BBC News
Umuvugizi w'aba Taliban Zabihullah Mujahid avugira mu kiganiro n'abanyamakuru mu murwa mukuru Kabul wa Afghanistan, ku wa kabiri ku itariki ya 17/8/2021

Ahavuye isanamu, Reuters

Insiguro y'isanamu,

Zabihullah Mujahid yasubije ibibazo by'abanyamakuru mu kiganiro cyanditse amateka cyo ku wa kabiri

Ubwo ku wa kabiri aba Taliban bakoreshaga ikiganiro cyabo cya mbere n'abanyamakuru kuva bakwigarurira Afghanistan, umuvugizi wabo Zabihullah Mujahid ni we wavugaga cyane.

Bwana Mujahid yasubije ibibazo ku ngingo zitandukanye byabajijwe n'abanyamakuru muri icyo kiganiro cyanditse amateka, aho yavuze ko uburenganzira bw'abagore buzubahirizwa "mu rwego rw'amategeko ya kisilamu".

Kuri benshi mu banyamakuru barebaga icyo kiganiro, hari ikindi kintu na cyo cyari icy'agaciro gakomeye: ni bwo bwa mbere bari babonye isura ye.

Mu gihe cy'imyaka ishize, yakoreye ahatagaragara, abanyamakuru bakumva ijwi rye gusa kuri telefone.

Umunyamakuru wa BBC Yalda Hakim avuga ko "yumiwe" abonye isura y'umugabo yari amaze imyaka irenga 10 avugana na we, ubwo yari arimo gusubiza ikibazo cya mbere cyabajijwe n'umunyamakuru w'umugore.

Umuvugizi w'aba Taliban yashatse gukoresha imvugo yo gutanga ihumure, abwira undi munyamakuru ati: "Ntabwo dushaka [kugira] abanzi na bamwe bo mu gihugu cyangwa bo hanze".

Ariko Madamu Hakim avuga ko ibi bitandukanye cyane na bumwe mu butumwa yari amenyereye kohererezwa n'uyu muvugizi w'aba Taliban.

Agira ati: "Bumwe muri ubu butumwa bwo kuri telefone bwari ubutumwa bukakaye bwiyitirira Islam. Bumwe muri bwo bwatumaga utekereza uti: 'Uyu muntu afite inyota y'amaraso y'Abanyamerika, afite inyota y'amaraso y'uwo ari we wese wo muri leta ya Afghanistan'. None uyu munsi [ku wa kabiri] yicaye hariya avuga ko nta kwihimura kuzabaho".

"Mu gihe cy'imyaka yohereje aya matangazo yumvikanamo kunyoterwa n'amaraso none ubu ahise ahinduka umuntu ukunda amahoro? Biragoye kubihuza".

Insiguro ya video,

Umuvugizi w'aba Taliban ati: "Ntituzemera ko ubutaka bwa Afghanistan bukoreshwa mu kurwanya uwo ari we wese"

Mujahid yari yicaye mu ntebe kugeza mu gihe cya vuba aha gishize yicarwagamo na Dawa Khan Menapal, wari ukuriye ikigo cya leta ya Afghanistan cyo gutangaza amakuru, wishwe n'intagondwa z'aba Taliban mu ntangiriro y'uku kwezi.

Bwana Mujahid icyo gihe yigambye ko ari aba Taliban bamwishe, anavuga ko Bwana Menapal "yiciwe mu gitero kidasanzwe".

Abandi banyamakuru benshi bakomeje kwandika kuri Twitter ku bijyanye no kuba babonye Bwana Mujahid, barimo n'umunyamakuru wa BBC urambye muri uyu mwuga, John Simpson, wamwise "umugabo w'ibitekerezo biri hagati na hagati, mwiza".

BBC ntibazwa ibivuye ku zindi mbuga.

Undi munyamakuru, Sharif Hassan, na we yavuze ko bwari bwo bwa mbere yari abonye isura ya Bwana Mujahid, nubwo mu kazi ke bari baravuganye bakanandikirana kenshi.

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

BBC ntibazwa ibivuye ku zindi mbuga.

Ariko mu gihe cy'imyaka hakomeje guhwihwiswa niba uwo muvugizi utazwi isura mu by'ukuri ashobora kuba ari umuntu urenze umwe.

Lyse Doucet, umunyamakuru mpuzamahanga mukuru wa BBC, yavuze ko ibi biganiro byabayeho mbere cyane yuko haduka imbuga nkoranyambaga, ubwo abanyamakuru bagombaga kumuhamagara kuri telefone yo mu biro.

Avuga ko hari bamwe bavuze ko umugabo wari wicaye imbere y'abanyamakuru ku wa kabiri yagaragaraga nk'umuntu muto cyane kuburyo ataba ari we koko wasubizaga ibibazo by'abanyamakuru muri iyo myaka yose.

Madamu Doucet agira ati: "Hashize imyaka hariho guhwihwisa ko ari izina ryahimbwe, ko hariho ba "Zabihullah" benshi basimburana. Ubu birumvikana ko twese turimo kwemera ko uyu ari we Zabihullah Mujahid. Wenda si we?"

Madamu Hakim avuga ko amayobera asanzwe ari mu mikorere y'aba Taliban.

Ati: "Uko ni ko aba Taliban bameze, bakora ibintu biri ku murongo kandi bishingiye ku ngengabitekerezo - nta kintu na kimwe bakora kibagwiririye. Mu guteza amayobera ku muntu umwe, agize atya ahita agaragara kuri televiziyo - nta kundi washoboraga kubikora neza kurenze uko".

Hatitawe ku kuba Bwana Mujahid ari umuntu umwe cyangwa benshi, Madamu Hakim avuga ko atashize amakenga amagambo ye yo ku wa kabiri nubwo yakoze kuburyo agaragaza kwigengesera.

Ati: "Icyitonderwa rwose cyari itegeko rya sharia - ibyo byanteye gusuherwa mu rutirigongo. Na n'ubu ntibaragaragaza uko iryo tegeko riteye".

"Uko ni ko aba Taliban bameze - ni abanyamacenga, bazi kwigaragaza neza byo gukurura abantu, bazi gukoresha imvugo iboneye, ariko nta na rimwe uba uzi neza niba ukwiye kubizera cyangwa kutabizera".

"Hari amayobera menshi ... ariko se tuzi neza abo ari bo?"