New York: Urubanza rwa R Kelly kw'ihohotera rifatiye ku gitsina rwatanguye

Igicapo ca R Kelly muri sentare i New York urubanza rwiwe rutanguye

Ahavuye isanamu, Reuters

Insiguro y'isanamu,

Umuhinga mu gucapa muri sentare yacafye R Kelly (wa kabiri uvuye i buryo) igihe urubanza rwiwe rwatangura

Urubanza rw'uyu muririmvyi wo muri Amerika aririmba umudiho wa R&B rwatanguriye muri sentare yi Brooklyn i New York.

Iki camamare cagirizwa amagendu, guhohotera bifatiye ku gitsina hamwe no gutanga igiturire; ivyaha amaze guhakana inshuro nyinshi.

Bimwe mu vyaha bishinjwa uyu muririmvyi - asanzwe yitwa Robert Sylvester Kelly - ni ivyo kuva mu myaka 20 iheze.

Niyahamwa n'ivyaha vyose yagirizwa arashobora gupfungwa imyaka mirongo.

Amajambo atanguza urubanza yasomewe amugwi w'abanyagihugu baca urubanza (jury) ugizwe n'abagabo indwi hamwe n'abagore batanu, bakazofata icemezo ku coshikira uyu muririmvyi w'imyaka 54.

Kelly yagirizwa kuba yari kizigenza mu gikorwa camaze imyaka mirongo ibiri aho haronderwa abagore hamwe n'abakobwa badakwije imyaka bagashorwa mu busambanyi.

Ahavuye isanamu, Reuters

Insiguro y'isanamu,

Umushingwamanza Gloria Allred (i bubamfu) hamwe n'uwo mu muryango wa Jocelyn Savage bafotowe bari hanze ya sentare i Brooklyn kuri uno wa gatatu

Icegera c'umushinjacaha Maria Melendez mw'ijambo ritanguza urubanza yavuze yuko "uru rubanza rwerekeye "inyamaswa y'impigi".

Yavuze ko R Kelly "ari umuntu yakoresheje ibinyoma, kuryosharyosha, gutera ubwoba hamwe no gukoresha inguvu mu kuganza abo yahohotera kandi abikora yidegemvya mu kiringo c'imyaka myinshi".

Kelly yagirizwa kuba yarabwiriza abo yahohotera kwerekana ko "bamwihaye rwose" kandi bakubaha ataguharira amategeko yiwe yose, harimwo yuko bafungura canke bakaja mu bwiherero ari uko abahaye uruhusha, ntibarabe abandi bagabo, kandi bakamwita "Daddy" (Papa).

R Kelly yavuze ko ari umwere kuri ivyo vyose yagirizwa kandi ahakana yivuye inyuma ko ata kibi na kimwe yakoze.

Ahavuye isanamu, Reuters

Uru rubanza, rwasibijwe kenshi kubera ikiza ca covid kandi rukaba rwitezwe kumara nk'ukwezi kumwe, vyitezwe ko ruvugirwamwo ivyagiriji vy'ihohotera ryakozwe na Kelly, harimwo ubuhamya bwa bamwe mu bagore hamwe n'umugabo ashika kuri umwe bamwagiriza.

Naho yogirwa umwere, Kelly arindiriwe n'ibidi vyagiriji bifatiye ku gitsina muri Illinois na Minnesota, aho naho akaba yarahakanye ivyo ahagirizwa.

Kelly amaze imyaka ibiri mw'ibohero. Yimuriwe i Brooklyn mu kwezi kwa gatandatu akuwe i Chacago ku bw'uru rubanza.

Uyu mugabo w'imyaka 54 azwi cane ku ndirimbo ziwe zakunzwe zirimwo Ignition (Remix), I Believe I can Fly, Bump n'Grind na If I Could Turn Back the Hands of Time.

Ari mu nzira yerekeza aho urubanza rubera, umuhinguzi w'ibiganiro wa BBC, Monica Miller yagize ati; "Ni umunsi wa gatatu udasanzwe i Brooklyn. Abashigikiye R. Kelly bariko bararengana bavugira hejuru bati "Rekura R Kelly".

Ni ibiki yagirizwa?

Kelly hamwe n'abakorana nawe bagirizwa kurondera abagore n'abakobwa batarakwiza imyaka bakabashora mu busambanyi budakurikije amategeko hamwe n'uwo muririmvyi.

Ivyo vyagiriji ni ivyo kuva mu myaka y'1990, vyinshi bikibanda ku bifatwa nk'uruhigi rwarondera abakobwa b'imiyabaga.

Ahavuye isanamu, Getty Images

Insiguro y'isanamu,

Uyu muririmvyi yamye akurikirwa n'ivyagiriji vyo kwigenza nabi mu bijanye n'igitsina kuva mu myaka y'1990

Kuri ubu R Kelly akurikiranywe mu maleta menshi agize Leta Zunze Ubumwe za Amerika, ivyagiriji bikaba birimwo guhohotera bifatiye ku gitsina, guhohotera uwutarakwiza imyaka, gufata amasanamu y'urukozasoni y'abatarakwiza imyaka, igiturire hamwe no kunaniza ubutungane.

Ubushinjacaha bwashingiye urubanza ku bagore batandatu batavuzwe amazina.

Ivyagiriji icenda vyashizwe imbere bivuga ku kugirira nabi abantu bo mu ciswe Jane Doe, batatu muri bo bikavugwa ko bari batarakwiza imyaka y'ubukuru igihe bahohoterwa.

Abashingwamanza ba Kelly vyitezwe ko bavuga yuko bimwe muri ivyo vyagiriji ari ivy'abagore bari baramukunze ariko ntibaronke ico bashaka, mu gihe mu ntango bari bemeye guhuza ibitsina nawe.