Ethiopia: Inyeshyamba zo muri Tigray zirashinjwa gusenya amavuriro

Intambara muri Ethiopia yatangiye mu mezi 10 ashize

Ahavuye isanamu, AFP

Insiguro y'isanamu,

Intambara muri Ethiopia yatangiye mu mezi 10 ashize

Leta ya Ethiopia ivuga ko inyeshyamba zashenye amavuriro abarirwa mu bihumbi mu gice cy'amajyaruguru y'igihugu.

Abantu barenga miliyoni 1.9 bo mu turere twa Amhara na Afar muri Ethiopia nta buvuzi bashobora kubona nyuma y'amakuru avuga ko inyeshyamba zikorana n'umutwe wa Tigray People's Liberation Front (TPLF) zashenye ku bushake zikanasahura amavuriro.

Inyeshyamba ntizirasubiza kuri ibi birego bishya.

Ku wa kabiri, Minisitiri w'ubuzima wa Ethiopia Lia Tadesse yabwiye abanyamakuru ko inyeshyamba zashenye ibitaro 20, ibigo nderabuzima 277 ndetse n'amavuriro mato y'inyunganizi 1,162 mu karere ka Amhara.

Madamu Lia yongeyeho ko ikigo cy'ibitaro kimwe, ibigo nderabuzima 10 n'amavuriro mato y'inyunganizi 38 byashenywe mu karere ka Afar.

Ku itariki ya 30 y'ukwezi kwa munani uyu mwaka, Minisitiri w'uburezi wa Ethiopia Getahun Mekuria yavuze ko inyeshyamba zashenye amashuri arenga 7,000 mu majyaruguru ya Ethiopia, arimo 445 yo mu karere ka Afar n'arenga 140 yo mu karere ka Amhara.

Imirwano hagati y'inyeshyamba zo mu karere ka Tigray n'ingabo za leta ya Ethiopia yatangiriye muri Tigray mu kwezi kwa cumi na kumwe mu 2020, ariko ubu imaze gukwirakwira mu turere bihana imbibi twa Amhara na Afar.

Insiguro y'amajwi,

Ethiopia: Imvo n'Imvano ku ntambara hagati y'ingabo za leta n'inyeshyamba zo muri Tigray

Imirwano yakajije umurego kuva mu kwezi kwa gatandatu uyu mwaka ubwo inyeshyamba zisubizaga igice kinini cya Tigray harimo n'umurwa mukuru wayo Mekelle.

Ubu zibumbiye mu mutwe wa Tigray Defence Forces (TDF) uhuriwemo na TPLF n'indi mitwe yitwaje intwaro yaho.

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n'ingabo za leta ya Ethiopia mu kwezi kwa cumi na kumwe mu 2020.

Abakuru ba TPLF bashwanye na Minisitiri w'intebe wa Ethiopia Abiy Ahmed ku bijyanye n'amavugurura muri politiki, nubwo kuba TPLF yarafashe ibigo bya gisirikare by'ingabo za leta byo muri Tigray ari yo yabaye imbarutso y'igitero leta yayigabyeho.

Leta ya Ethiopia ivuga ko TPLF ari umutwe w'iterabwoba, ariko TPLF yo ivuga ko ari yo leta y'akarere ka Tigray yemewe n'amategeko.