Burundi: Imvo n'Imvano ku nama rukokoma ku iterambere ry'igihugu yabereye i Bujumbura (igice cya kabiri)
Mwongeye kuramukana amahoro mwese muteze amatwi Imvo n'Imvano yo kuri uyu wa gatandatu tariki ya 11 z'ukwezi kwa 12 mu 2021.
Nkuko nabibemereye ubushize rero, uyu munsi turabagezaho igice cya kabiri cy'ikiganiro twabagejejeho ku wa gatandatu ushize, ikiganiro cyavugaga ku nama yahuje incabwenge z'u Burundi ziba hirya no hino ku isi, abagize leta y'u Burundi, abagize inama nshingamateka na nkenguzamateka z'u Burundi, n'abandi bategetsi bakuru b'igihugu.
Insanganyamatsiko y'iyo nama y'iminsi ibiri yabaye ku itariki ya 18 na 19 z'ukwezi gushize yari: Kuba u Burundi bwahindutse igihugu kiri kuzamuka mu majyambere mu mwaka wa 2040.
Turayigereranya n'inama rukokoma kandi kubera ko yari inama ya mbere yateguwe muri ubwo buryo mu mateka y'icyo gihugu kandi ntaho iteganijwe mu mategeko cyangwa mu itegekonshinga ry'u Burundi.
Ibiro by'umukuru w'igihugu byavuze ko byateguye iyo nama biturutse ku gitekerezo cya Perezida Evariste Ndashimiye umaze iminsi atega amatwi abaturage bo mu nzego zose z'u Burundi ku buryo icyo gihugu cyakwikura mu icuraburindi ry'ubukene, dore ko kiri mu bihugu bitatu bikennye kurusha ibindi ku isi.
Ahavuye isanamu, Twitter/Ntare Rushatsi House
Abari bitabiriye inama ku iterambere ry'u Burundi, yari iyobowe na Perezida Ndayishimiye (imbere hagati)
Kubera uburemere bw'iyo nama, Imvo n'Imvano yahisemo kuba urubuga rw'ibitekerezo byayitangiwemo. Twahuje abayiteguye n'abayitabiriye kugira ngo ducoce ibyavugiwemo n'ibyemejwe. Turagerageza kurebera hamwe icyadindije iterambere mu Burundi, tunarebere hamwe uko icyo gihugu cyazamuka kikagera ku ntego y'iterambere leta yiyemeje mu mwaka wa 2040.
Abatumire bacu bari François Nibizi, ushinzwe iterambere mu biro by'umukuru w'igihugu mu Burundi, Faustin Ndikumana ukuriye ishyirahamwe Parcem rihamagarira Abarundi guhindura ivyiyumviro n'ingendo kugira ngo bagere ku iterambere bifuza, bose bari mu Burundi.
Mu baje muri iyo nama baturutse hanze harimo na Elvanie Kagwiza waje mu nama avuye mu Bufaransa aho aba, akora akaniga mu by'ubwubatsi, akaba ari murwi w'abafata ibyemezo mw'ihiganwa rihuza urwaruka rufite munsi y'imyaka 20 bafite imigambi ishobora guhindura ubuzima bw'abantu, bita Labo d'Innovation Paris 2021. Anakuriye ishyirahamwe Elles Go rihimiriza abakobwa n'abagore kwitabira imirimo ikunze gukorwa n'abagabo. Yanatsindiye agashimwe k'umunyeshuri ushobora kuvuga ibyo akora mu masogonda 180, gatangwa na Kaminuza yitwa Ecole Universitaire Paris-Saclay.
Iki kiganiro mwagiteguriwe kandi murakigezwaho na Félin Gakwaya.