South Africa: De Klerk yari intwari ariko umurage we ntuvugwaho rumwe – Ramaphosa

Mu magambo yo gushima Frederik Willem de Klerk, Perezida wa nyuma w'Afurika y'epfo yo mu gihe cy'ubutegetsi bw'ivanguramoko bwa ba nyamucye b'abazungu bwa apartheid, Perezida Cyril Ramaphosa yagerageje kuba hagati na hagati.

Yemeye akababaro abantu bamwe batewe na we hamwe n'umusanzu we mu kubaka igihugu kigendera kuri demokarasi.

De Klerk, wapfuye mu kwezi gushize afite imyaka 85, yagize uruhare rukomeye mu kugeza ba nyamucye b'abazungu bo muri icyo gihugu ku kwemera ko ubwo butegetsi bw'ivanguramoko busenyuka mu myaka ya 1990.

Nanone ariko, yungukiye muri ubwo butegetsi ndetse yagize uruhare muri bimwe mu byaha byabwo.

Avugira mu gikorwa cya leta cyo kumwibuka cyabereye i Cape Town, Perezida Ramaphosa yavuze ko ijambo rya de Klerk ryo mu 1990 risaba ko Nelson Mandela - wayoboye ibikorwa byo kurwanya ubutegetsi bwa apartheid - afungurwa, ryari "igikorwa cya gitwari".

Yanashimye "umurava n'imyemerere" ye.

Ariko Bwana Ramaphosa yongeyeho ko ari ingenzi kwemera ko "umusanzu we n'umurage we bikomeje kutavugwaho rumwe".

Ati: "Ntidushobora kwirengagiza kandi ntitugomba gushaka kwirengagiza uburakari n'akababaro by'abibuka umwanya FW de Klerk yari afite mu butegetsi bwa leta y'ikandamiza".

Nanone ariko "yagize uruhare rw'ingenzi mu gukura kwa demokarasi nshya yacu twabishaka [cyangwa] tutabishaka".

Mbere y'icyo gikorwa cyo kumwibuka, polisi yatatanyije abigaragambya bacye bari hanze y'urusengero rwa Groote Kerk i Cape Town, basaba "ubutabera ku bazize apartheid".