Leta ya Ethiopia yamaganye inama ya UN iteganyijwe ku burenganzira bwa muntu

Ethiopia yamaganye gahunda y'urwego rukuru rwita ku burenganzira bwa muntu rwo mu muryango w'abibumbye (ONU/UN) yo gukoresha inama yihariye ku wa gatanu yiga ku kuntu ibintu bimeze muri Ethiopia ku bijyanye n'uburenganzira bwa muntu.

Minisiteri y'ububanyi n'amahanga ya Ethiopia yavuze ko "itewe urujijo rwinshi kandi ibabajwe" n'icyemezo cy'akanama k'uburenganzira bwa muntu ka ONU cyo gukoresha inama kuri Ethiopia ku busabe bw'umuryango w'Ubumwe bw'Uburayi (EU/UE).

Leta ya Ethiopia yasabye ibihugu binyamuryango by'ako kanama ka ONU k'uburenganzira bwa muntu kwanga icyo kiganiro cyihariye bigatora bicyamagana.

Mu itangazo, leta ya Ethiopia yagize iti: "Ahubwo, icyari kuba cyarabaye icy'ingenzi cyane ku kanama, kari akazi kihutirwa ko gukora iperereza ku ihonyorwa ry'uburenganzira bwa muntu n'ubwicanyi ndengakamere byakozwe n'umutwe w'iterabwoba wa TPLF [Tigray People's Liberation Front] muri za leta z'uturere twa Afar na Amhara".

Ingabo za leta ya Ethiopia n'inyeshyamba za TPLF bashinjwa ubwicanyi ndengakamere.

Akanama ka ONU k'uburenganzira bwa muntu katangaje ko iyo nama iziga "ku kuntu ibijyanye n'uburenganzira bwa muntu bimeze nabi cyane" muri Ethiopia.

Mu kwezi kwa cumi na kumwe uyu mwaka, Ethiopia yatangaje ko yashyizeho itsinda ryo gusuzuma ihonyorwa ry'uburenganzira bwa muntu mu gihe cy'intambara mu majyaruguru hagati y'ingabo za leta ya Ethiopia n'inyeshyamba za TPLF.

Yavuze ko ibyo bijyanye n'ibyo yasabwe muri raporo ihuriweho n'akanama ka Ethiopia k'uburenganzira bwa muntu n'akanama ka ONU k'uburenganzira bwa muntu.