Ethiopia – Tigray: Igitero cy'indege cyishe abantu za mirongo mu nkambi – abatanga imfashanyo

Umwana urimo kwitabwaho mu bitaro mu mujyi wa Dedebit, nyuma yuko bitangajwe ko habaye igitero cy'indege mu karere ya Tigray mu majyaruguru ya Ethiopia

Ahavuye isanamu, Reuters

Insiguro y'isanamu,

Umwana urimo kwitabwaho mu bitaro mu mujyi wa Dedebit, nyuma yuko bitangajwe ko habaye igitero cy'indege

Abantu 56 bishwe naho abandi babarirwa muri za mirongo barakomereka mu gitero cy'indege cyabereye mu nkambi y'abavuye mu byabo mu majyaruguru ya Ethiopia, nkuko bivugwa n'abakozi batanga imfashanyo.

Amafoto ari ku mbuga nkoranyambaga bivugwa ko yerekana abantu barimo kuvurwa, nyuma y'igitero cy'indege ku ishuri ryo mu mujyi wa Dedebit mu karere ka Tigray muri Ethiopia.

Nta bwo iki gitero kiremezwa n'uruhande rudafite aho rubogamiye.

Ingabo za leta ya Ethiopia zimaze amezi 14 zirwana n'inyeshyamba, muri iyi ntambara imaze guhitana abantu babarirwa mu bihumbi.

Mu gihe imirwano ku butaka hagati y'ingabo za leta ya Ethiopia n'urugaga rw'inyeshyamba - ruyobowe n'Abanya-Tigray - yabaye ihagaze, ibitero by'indege ku birindiro by'inyeshyamba byo byarakomeje.

Ku wa gatandatu, abakozi batanga imfashanyo babwiye ibiro ntaramakuru Reuters ko umubare w'abapfuye wemejwe n'abategetsi bo muri ako gace.

Aba bakozi batanga imfashanyo, batatangajwe amazina, banatanze amafoto yerekana abantu bakomeretse bari mu bitaro, barimo n'abana.

Skip Podcast and continue reading
Podcast
Ikiganiro cy’abagore

Ikiganiro cy’abagore kuri BBC Gahuzamiryango

Inkurikirane

End of Podcast

Ntibiramenyekana uburyo n'impamvu iryo shuri ryarashweho. Mbere, leta ya Ethiopia yagiye ihakana ivuga ko itarasa ku baturage b'abasivile.

Ku wa gatanu, leta ya Ethiopia yatangaje irekurwa ry'abatavuga rumwe n'ubutegetsi benshi bakomeye, barimo n'abakuru bo mu mutwe w'inyeshyamba wa Tigray People's Liberation Front (TPLF).

Minisitiri w'intebe Abiy Ahmed yavuze ko icyo gikorwa kigamije kugera ku bwiyunge mu gihugu no guteza imbere "ubumwe".

Intambara muri Tigray yatangiye mu kwezi kwa cumi na kumwe mu 2020, nyuma yuko Bwana Abiy atanze itegeko ryo kugaba igitero cya gisirikare ku ngabo z'akarere zo muri Tigray. Yavuze ko yabikoze mu rwego rwo kwihimura ku gitero cyagabwe na TPLF ku kigo cya gisirikare cy'aho cy'ingabo za leta ya Ethiopia.

Byabaye nyuma y'amezi yari ashize hari amasinde hagati y'ubutegetsi bwa Bwana Abiy n'abakuru ba TPLF.

Abantu benshi bataye ingo zabo kubera iyi ntambara, ndetse umuryango w'abibumbye (ONU/UN) waburiye ko aka karere ka Tigray gacyeneye imfashanyo yihutirwa y'ibiribwa, hamwe n'imfashanyo y'imiti.