Kizza Besigye yafashwe n'igipolisi

Kizza Besigye Uwufise ububasha kw’isanamu Reuters
Image caption Kizza Besigye

Umukuru w'ishyaka FDC (Forum for Democartic Change) rirwanya ubutegetsi muri Uganda, Kizza Besigye, hamwe n'abandi bakuru b'amashyaka 3 arwanya ubutegetsi hamwe n'abashingamateka barenga 5, batawe muri yombi.

Bafashwe n'igipolisi cya Uganda mu gitondo igihe bashakaga kujya ku kazi n'amaguru mu mugambi wo kwerekana ko bamagana ibikorwa bya leta.

Abo bantu bayobozi barwanya ubutegetsi bwa Prezida Museveni bafatanywe n'abandi barwanashyaka benshi ariko igipolisi nticyabatindanye mu buroko, kuko cyabagejeje imbere y'urukiko rw'i Kampala maze umucamanza yemeza ko bagomba guhita barekurwa.

Bamaganaga izamuka ry'ibicoro by'ibintu mu gihugu na cyane cyane amavuta hamwe n'ibiribwa bavuga ko biterwa n'imisoro ihambaye leta isoresha.

Umukuru w'igipolisi cyo muri Uganda, General Kale Kayihura yahamagaje ikiganiro n'abanyamakuru avuga ko bafashe Kizza Besigye kuko yashakaga kubuza imodoka kugenda mu muhanda, ngo yicaye mu muhanda hagati bituma imodoka zidashobora kugenda.

Ibi bibaye kandi nyuma yaho ubuyobozi bw'igipolisi busohoreye itangazo mu cyumweru gishize risaba abanyagihugu kutitabira amabwiriza yababahamagarira kwigaragambya bashaka guhungabanya umutekano w'igihugu.