Urubanze rwa Ingabire rwasubitswe

Victoire Ingabire
Image caption Victoire Ingabire

Urukiko rukuru rwo mu Rwanda rumaze gusubika urubanza rwa Victoire Ingabire umukuru w’ishyaka rya FDU inkingi ritavuga rumwe n’ubutegetsi.

Ingabire Victoire yasabye abacamanza ko bamuha igihe gihagije kugira ngo abashe gutegura neza urubanza we n’abamwunganira.

Nubwo yari yasabye igihe kigera ku mezi atatu, abacamanza bategetse ko ruzasubukurwa taliki 20/6/2011.

Victoire Ingabire watawe muri yombi mu kwezi kwa 12 umwaka ushize, akurikiranyweho ibyaha birimo ubufatanyacyaha mu bikorwa by’iteterabwoba, ubufatanyacyaha bwo kurema umutwe w’ingabo hagamijwe igitero cy’intambara no kubiba amacakubiri.

Muri uru rubanza, Ingabire Victoire, araregwa hamwe na Colonel Tharcisse Nditurende, Lt Colonel Noeli Habyaremye and Major Vital Uwumuremyi - abagabo bahoze mu mutwe winyeshyamba za FDLR.