Ingabo za Kenya muri Somalia

Abasirikare ba Kenya baganira n'umushumba hafi y'umupaka wa Kenya na Somalia Uwufise ububasha kw’isanamu BBC World Service
Image caption Abasirikare ba Kenya baganira n'umushumba hafi y'umupaka wa Kenya na Somalia

Ministri w'ububanyi n'amahanga wa Kenya, Moses Wetangula, yemeje amakuru avuga ko ingabo za Kenya zinjiye muri Somalia kurwanya intagondwa z'abayislamu bo mu mutwe wa Al Shabaab.

Ababyiboneye baravuga ko ibimodoka by'intambara byo mu bwoko bwa bulende na za kajugujugu byinjiye muri Somalia ejo ku cyumweru.

Kenya irashinja intagondwa zo mu mutwe wa Al Shabaab kuba arizo ziri inyuma y'ibikorwa by'ubushimusi bw'abanyamahanga bumaze iminsi bwibasiye igihugu cya Kenya.

Ministri w'ububanyi n'amahanga wa Kenya yavuze ko ingabo za Kenya zinjiye muri Somalia zibisabwe na leta y'inzibacyuho ya Somalia.

Hagati aho, intagondwa z'abayislamu bo mutwe wa Al Shabaab zirasaba Kenya guhita ivana abasirikare bayo muri Somalia ngo kugirango amaraso atazatemba ari menshi.

Itangazo ryashyizwe ahagaragara n'umutwe wa Al Shababu riraburira abanyaKenya kutareka intambara ngo yinjire mu gihugu cyabo.

Umutwe wa Al Shabaab uhakana kugira uruhare mu bikorwa by'ubushimusi bw'abanyamahanga ku butaka bwa Kenya.