Ubutegetsi bwa Col Gaddafi mu mafoto

Abategetsi b'inzibacyuho muri Libya batangaje ko Col Muammar Gaddafi wahoze ayobora Libya yaguye mu mirwano mu mujyi wa Sirte.

Col Muammar Gaddafi
Insiguro y'isanamu,

Muammar Gaddafi mu kwezi kwa 9 muri 1969 nyuma y'ibyumweru bike ahiritse ingoma y'umwami Idris. Yari afite gusa imyaka 27 igihe yatangiraga kuyobora Libya.

Insiguro y'isanamu,

Col Gaddafi akiri muto yakundaga cyane politiki yo gukunda igihugu y'abakuru b'ibihugu by'abarabu nka Perezida Gamal Abdel Nasser wa Misiri. Iyo politiki yayivanze na socialisme n'idini ya Islamu hanyuma muri 1975 asohora amatwara ye ya politiki mu gitabo yise icyatsi kibisi (Green book).

Insiguro y'isanamu,

Muri 1971, Col Gaddaf, Perezida wa Misiri Anwar Sadat na Perezida wa Syria Hafez Assad bashyizeho ishyirahamwe ry'ibihugu by'abarabu ariko ntihagira icyo rigeraho.

Insiguro y'isanamu,

Akigera ku butegetsi, hari ababonaga Col Gaddafi nka Che Guevara wo muri Afurika.

Insiguro y'isanamu,

Mu myaka ya za 80, Col Gaddafi yemereye imitwe yitwaje intwaro yo muri Afurika y'uburengerazuba kwitoreza mu gihugu cye kandi anashyigikira indi mitwe irimo Irish Republican Army na Palestine Liberation Organisation.

Insiguro y'isanamu,

Col Gaddafi yari afitanye umubano mwiza n'uwahoze ari Perezida wa Misiri, Hosni Mubarak. Bivugwa ko atishimiye ko Hosni Mubarak avanwa ku butegetsi n'imyigaragambyo.

Insiguro y'isanamu,

Col Gaddafi yaje kugirwa igicibwa n'amahanga kubera gukorana n'imitwe y'intagondwa n'ihanurwa ry'indege ya Pan Am i Lockerbie muri Ecosse. Ariko umubano n'amahanga waje kuba mwiza mu myaka 10 ishize nyuma yaho Libya yemeye uruhare rwayo mu ihanurwa ry'iyo ndege kandi yemerera amahanga kugenzura gahunda yayo y'intwaro.

Insiguro y'isanamu,

Kuva yongera kwemerwa n'amahanga, Col Gaddafi yabashije gusohoka hanze y'igihugu cye mu myaka ishize. Aho yajyaga yasabaga ko ihema rye rihashingwa kugira ngo abashe kwakira abashyitsi akurikije umuco wo mu gihugu cye.

Insiguro y'isanamu,

Col Gaddafi yakundaga kusura igihugu cy'Ubutaliyani. Aha arikumwe na ministri w'intebe w'ubutaliyani Silvio Berlusconi.

Insiguro y'isanamu,

Mu ntangiriro z'uyu mwaka igihe abamwigometseho barimo kwisuganya, Col Gaddafi yabwiye abamushyigikiye mu murwa mukuru Tripoli ko "urugamba rugiye kuba rurerure"

Insiguro y'isanamu,

Mu gihe ingabo zimurwanya zarushijeho gukaza umurego kandi n'ibitero by'indege by'ingabo za OTAN bikarushaho kwiyongera, Col Gaddafi ntiyakomeje kwiyerekana cyane kuri TV.

Insiguro y'isanamu,

Ingabo z'akanama k'igihugu k'inzibacyuho zaje gufata umurwa mukuru Tripoli mu kwezi kwa 8 ariko Col Gaddafi ntizashobora kumuta muri yombi.