Yemen : abantu 5 biciwe mu myigaragambyo

Imyigaragambyo irwanya ubutegetsi muri Yemeni Uwufise ububasha kw’isanamu Reuters
Image caption Imyigaragambyo irwanya ubutegetsi muri Yemeni

Amakuru aturuka muri Yemeni aravuga ko abantu byibura batanu bishwe barashwe mu murwa mukuru Sanaa mu gihe bari mu myigaragambyo yamagana ibikubiye mu masezerano yashizweho umukono ejo na Perezida Saleh akemera kurekurira ubutegetsi umwungirije.

Perezida Saleh yamaganye icyo gitero ahita ategeka ko hakorwa iperereza kuri ubwo bwicanyi.

Abantu bitwaje intwaro bashyigikiye Perezida Saleh barashe mu bantu babarirwa mu bihumbi bari mu myigaragambyo irwanya ayo masezerano aha Perezida Saleh ubudahangarwa bwo kudakurikiranwa n'ubucamanza.

Ayo masezerano agamije guhagarika imyigaragambyo imaze amezi 9 ivugwa muri icyo gihugu isaba perezida Saleh kurekura ubutegetsi.

Inkuru y'isinywa ry'ayo masezerano ikimenyekana muri Yemen abantu babarirwa mu bihumbi barishimye ariko abandi bahita bamagana ayo masezerano.

Perezida Saleh azakomeza kuba umukuru w'icyo gihugu ku izina mu gihe cy'amezi atatu.