Inyandiko y'ibirego by'Uwinkindi mu Rwanda

Umushinjacyaha mukuru w'urukiko rw'Arusha rwashyiriweho u Rwanda, Aboubacar Jall, yagejeje inyandiko y'ibirego bya Jean Bosco Uwinkindi uregwa genocide kuri mugenzi we w'u Rwanda, Martin Ngoga.

Ibi bibaye nyuma yaho kw'itariki 16 z'ukwa 12 mu 2011, urugereko rw'ubujuriro rw'urukiko rw'Arusha rwangiye ubujurire bwa Jean Bosco Uwinkindi, rukemeza ko yoherezwa mu Rwanda.

Urwo rugereko ariko rwasabye umushinjacyaha guhindura ikirego mbere yuko Uwinkindi yoherezwa mu Rwanda kuburanishirizwaho.

Uru rugereko rwasabye ubwanditsi bw'urukiko kwemeza ko Akanama Nyafurika k'ikiremwa muntu kaba ariko gakurikirana uko ubutabera bw'u Rwanda bwitwara muri urwo rubanza.

Umushinjacyaha w'urwo rukiko yahise akosora iyo nyandiko ayishyikiriza ubwanditsi bw'urukiko

Abunganira Uwinkindi ariko basaba iminsi 15 yo kuyisoma, basaba ko yahindurwa mu ndimi z'ikinyarwanda n'igifaransa.

Inyandiko ivuguruye y'ikinyarwanda yashyikirijwe ubwanditsi tariki ya 22 z'ukwa 12 mu 2011 naho iy'igifaransa igerayo tariki 28 z'uko kwezi kwa 12.

Ubu rero ubushinjacyaha bugomba gushyikiriza urugereko iyo nyandiko ivuguruye bitarenze uku kwezi, urugereka rukemeza niba imeze neza nkuko rwabisabye.

Ubwo rero niho inzira yo kwohereza Uwinkindi mu Rwanda izaba itangiye, ubwanditsi bw'urukiko n'Akanama Nyafurika bikazumvikana uko bizakorwa.