Urubanza rwa Victoire Ingabire rwakomeje

Ingabire Vicotoire (iburyo) n'uwumwunganire Mre Gatera Gashabana (i bumoso)
Image caption Victoire Ingabire (i buryo) n'uwumwunganire Mre Gatera Gashabana (i bumoso)

Uyu munsi mu Rwanda urukiko rukuru rwakomeje iburanisha ry’urubanza rwa Ingabire Victoire, umukuru w’ishyaka FDU-Inkingi ritavuga rumwe na Leta y’u Rwanda.

Ingabire yahaswe itsinda ry’ibibazo n’uruhande rwunganira umwe mu basirikare bane bareganwa nawe, Major Vital Uwumuremyi.

Major Uwumuremyi yemeza ko yakoranye na Ingabire mu mutwe wa FDLR ndetse bakanategura umugambi wo gutera u Rwanda.

Ariko Ingabire yabihakanye kandi abwira urukiko ko atigeze amenya Uwumuremyi.

Bimwe mu bibazo Maitre Joseph Karenzi wunganira Major Vital Uwumuremyi yabajije Ingabire Victoire, birimo kumenya igihe n’uburyo yamenyanye na Uwumuremyi.

Inshingano yari afite mu ishyaka FDU-Inkingi rya Ingabire, n’umubare w’amafaranga yaba yaramwoherereje nk’uko bivugwa na Uwumuremyi.

Maitre Karenzi yavuze ko ibi bibazo bigamije kwereka urukiko ko kuba Ingabire aziranye na Uwumuremyi atari ibintu byaje bibagwiririye.

Ingabire yavuze ko ngo atigeze na rimwe amenyana n’umuntu witwa major Vital Uwumuremyi, mbere y’ifatwa rye ku itariki ya 14/10/2010.

Ingabire yabwiye urukiko ko uwo yari azi bari baziranye ku izina rya Kalimba Gaspard binyuze mu buryo bw’inyandiko za emails.

Ingabire akavuga ko Uwumuremyi yandikaga asaba kuba umunyamuryango w’ishyaka FDU kandi avuga ko yamubonye bwa mbere amaso ku maso ku itariki ya 16/01/2010 ageze mu Rwanda.

Ingabire kandi yanahakanye ko ngo nta mafaranga n’amwe yoherereje Vital nk’uko abivuga.

Gukorana na Vital Uwumuremyi

Ingabire yemereye urukiko ko nyuma yo kugera mu Rwanda yakoranye na Vital Uwumuremyi, nk’umuntu wamufashaga mu bintu bitandukanye.

Ndetse akanamugirira icyizere cyatumye bakorana mu makontalo(contrats) y’ubukode bw’inzu y’ubuturo.

Inteko y’abacamanza batatu yamubajije inshuro nyinshi, icyamuteye kugirira icyizere umuntu avuga ko atari azi mbere yo kugera mu Rwanda.

Mu gusubiza, Ingabire yavuze ko ngo nk’umuntu utari umenyereye u Rwanda yashakaga abamufasha kwegera abarwanashyaka be mu myiteguro y’amatora y’umukuru w’igihugu yashakaga kwiyamamarizamo.

Yongeyeho ko kuba uwumuremyi yareruye akemera gushyigikira umuntu utavuga rumwe na leta, ari indi mpamvu yamuteye kumugirira icyo cyizere.

CptJean Marie Vianney Karuta, Lt Col Tharcisse Nditurende, major Vital Uwumuremyi na Col Noel Habiyaremye baregwa gukora ibikorwa by’iterabwoba hagati y’imyaka ya 2004 na 2007 kandi barabyemera.

Aba basirikare bane kandi baregwa kurema umutwe w’ingabo wa CDF bakanashinja Ingabire gukorana nawo, ariko Ingabire arabihakana.

Uru rutonde rw’ibibazo Ingabire ari guhatwa n’abareganwa nawe ruzakomeza no ku munsi w’ejo, Lt Col Tharcisse Nditurende akaba ariwe utahiwe kubaza.